特首林鄭月娥公佈《施政報告》後接受不同傳媒訪問，總會被問到是否利用這份《施政報告》爭取連任。雖然林鄭否認此說，但有政界中人指，從林鄭多個訪問中釋放的訊息，「佢係話畀北京聽，自己已經做好晒連任嘅準備，只係等緊北京到適當時候叫佢去馬」。
該政界人士稱，以往北京考慮特首人選的條件，離不開能力及忠誠，但自反送中運動後，「北京對用人嘅條件，忠誠放喺最重最重、甚至近乎唯一嘅考慮，有冇能力已近乎可有可無」，所以本身是入境處長的曾國衞，可搖身一變成為政制及內地事務局長，「正正係政治忠誠更重要嘅體現」。
香港目前要面對控疫大問題外，疫情對經濟打擊更加嚴峻，該政界人士說，連一些建制及商界人士均對他說，以林鄭政府能力，「睇唔到佢哋有能力搞得掂，2021年社會同經濟只會更差」，所以林鄭要爭取連任，「只有係政治忠誠上做到超晒標，咁能力足唔唔足夠就唔重要」，所以整份《施政報告》被外間形容是「大灣區施政報告」、施政報告全面要求公職人員宣誓、殺通識科、林鄭甚至聲稱不會理會民望，「可能香港人、民主派覺得係負面嘢，但喺北京、林鄭角度睇可能係正面嘢，因為代表佢係對北京絕對忠誠，連民望都唔理」。
另一專業界別人士說，當年林鄭選特首，曾提及丈夫想她退休，當選特首令丈夫為她犧牲很多，「當年佢仲話對唔住呀老公，要佢繼續犧牲，但最近林鄭在訪問中再提及老公，已經話好耐冇同佢傾偈、所有時間都用嚟工作，顯示家庭再唔係佢連任與否障礙」，所以他相信田北辰指林鄭用《施政報告》爭取連任，「只係北京根本未諗，田北辰就玩提早踢爆，分分鐘壞林鄭好事」。
季陶
周一及周五刊出