喺政治正確當前，建制派連見外國領事嘅權利都會自閹，一係向外交部申請，一係索性唔去。一向以狙擊民主派人士為樂嘅鍵盤打手、全國政協副主席梁振英，前晚上載多張民主派出訪外國見政客嘅相片，仲憤然寫道：「罄竹難書，忍無可忍」，不過其中有張相係包括港區人大代表黃玉山、建制派班長廖長江同埋馬逢國，唔通689對呢三位都「忍無可忍」、三位建制派嘅罪行都「罄竹難書」？
689前晚發功，喺facebook連出十幾po、張貼多張民主派去外國見政客、受訪嘅相，仲寫上：「罄竹難書，忍無可忍」。但八方睇真啲，發現有張相係民主黨前主席劉慧卿，加埋黃玉山、馬逢國、廖長江，一齊見時任美國駐港總領事唐偉康嘅相。估唔到689唔止狙擊民主派，仲似乎要一次過搵出建制派「壞孩子」。
被689「忍無可忍」嘅黃玉山回覆八方查詢時話，張相喺銅鑼灣Japanese Club、日本領事Matsuda離任酒會上影嘅，強調當時係應邀參加酒會，同場仲有好多人大代表、立法會議員、外國駐港領事等，唔止佢哋三位喎。
一眾梁粉喺帖文留言問︰「若範（犯）國安（法）判一世？」又有網民質疑佢哋「奴才性格難改！人渣！」八方真係考究唔到班網民鬧緊邊位。
李八方