全球科技股已經去到盡反映亮麗前景嘅估值，未來能唔能夠實現，要等業績照妖鏡出場，例如隻Palantir，經營十幾年仲係蝕錢，今年收入升五成已算勁叻仔，但股價高位用到市銷率50倍去計價，根本唔實際。
至於美團（3690），第三季經調整溢利只係按年升5.8%，表現一般，原因係新業務美團閃購同美團優選業務擴充，令虧損擴大。假設新業務虧損按年相若，再撇除非經常性收入，美團季度經營溢利按年升六成，外賣業務仍受惠高經營槓桿，交到佢本身嘅功課，問題係，股價貴了。
大行平均預測美團明年收入升51%，相信係憧憬旅遊業務復蘇，以及新業務收入大升，預測頗為進取。現價相當於2023年大行預測市盈率30倍，未來有可能透過明顯調整嚟回復吸引力。不過，長線，仍然係優質，有朝一日科技股齊齊插水嘅話，美團仍然係可撈之選。
未來喺中國科技龍頭活喺反壟斷大趨勢之下，美團第三季業績反映咗一個事實，就係長遠只會投資、投資再投資。學似亞馬遜一樣，永世唔變現同時不停投資。所以，買得美團嘅話，長遠要預咗收入勁、盈利少嘅情況。
晉佳