BBC公佈咗2020年度體育風雲人物嘅候選人名單，利物浦隊長「神軒」佐敦軒達臣成為唯一嘅足球代表，佢將要同2020年F1總冠軍車手咸姆頓、著名桌球手奧蘇利雲等，一同爭奪呢項英國體壇殊榮。
2020年度風雲人物候選人除咗有軒達臣、咸姆頓同奧蘇利雲外，另外三個候選人分別係板球手波特、女騎師杜苑欣同拳手費利。頒獎禮已定咗當地時間12月20日舉行，英格蘭足球名宿連尼加會擔任頒獎禮其中一位主持，另外仲會有網上同電話投票，務求令選出嚟嘅得獎人眾望所歸，唔會俾人話造馬。
其實除咗頒發年度風雲人物外，大會仲設有好多獎項，例如最佳隊伍、最佳教練、年度全球體育明星同無名英雄等。曼聯前鋒拉舒福特就最威，已肯定獲選。因為福仔喺武漢肺炎肆虐期間，成功爭取學童放假時可仲可以繼續享有食物券，結果令好多低收入家庭學童都得到溫飽，佢因此獲頒特別成就獎。
不過神軒成為2020年度風雲人物嘅機會似乎就唔高，博彩公司最睇好七奪F1總冠軍嘅「黑帝」咸姆頓成為年度風雲人物，勝出賠率得1.25倍。至於號稱現役最佳重量級拳手嘅拳王費利同「火箭」奧蘇利雲，勝出賠率就有6.5倍，軒達臣勝出賠率有成15倍。畢竟睇往績，足球員甚少贏得風雲人物獎，對上一次有足球員勝出已經係2009年嘅曼聯名將傑斯。