引發最大規模感染嘅跳舞群組，男女染疫患者年齡差距惹人遐想，全城熱議「阿姨，我不想努力了！」呢句潮語。抗疫疲勞、經濟惡劣的確讓人心很累，就連睇住成盤本地連鎖時裝品牌生意嘅實政圓桌立法會議員田北辰，都要搵阿哥、萬泰集團主席田北俊講句：「阿哥，我不想努力了！」
田二少噚日喺fb出po，上載同阿哥喺快餐店食漢堡包嘅合照，好鬼抵死又貼地咁話我終於搵到個對的人，可以講呢句說話：「阿哥，我不想努力了。」
二少同八方講，平時同大少都有聚餐，但因為食厭咗中菜，加上疫情下，通街都少咗人，所以唔去酒店餐廳食飯，去咗比較開揚嘅快餐店。似乎食慣fine dining嘅二少仲話自己點餐、拎餐具，同阿哥兩支公食burger，都真係第一次。
當然二少話「不想努力了」都係講吓笑，但佢話出呢個po真係有另一層意思，而大少係未必知道嘅。就係佢盤生意係要交租、阿哥相反有租收，所以疫情之下，佢即使生意大都係捱得苦，所以啱啱呢餐當然係大少埋單。二少又話戴口罩、勤洗手係新常態，感嘆全球疫情搞唔掂，佢目前只希望政府做好輸入個案防範工作，特別係機場開始嘅隔離、檢測措施。
李八方