【本報訊】黃之鋒與林朗彥非首次入獄，周庭則第一次面對監禁，戰友黃莉莉坦言最擔心正是周庭，「佢唔係一個好易可以接觸到佢內心嘅人，唔係一個會打開自己軟弱畀人睇嘅女仔。」
至於另外兩個「男仔」，她跟林朗彥曾是情侶，首次意識身邊有人坐監亦正因對方。時為2016年，林被還柙兩周，「好迷惘，嗰陣負責做後援，但當時未有成熟在囚支援，全部都係自己逐樣問懲教」，她亦觀察到林的成長，「以前係思考同行動好同步嘅人，社會較允許唔同形式行動、示威，所以會諗有乜行動做，今日社會氣氛唔同咗，好多限制，佢多咗沉住氣，知道呢刻可以做嘅領域就站穩陣腳做。」
跟黃之鋒最相熟的鍾禮謙看着對方由14歲開始一直處於鎂光燈下，「外界睇佢可能係好強勢，有師奶覺得佢係神，但佢都係人一個」；他憶述，傘後學民內部開會檢討，之鋒曾試過「飛電腦」，「知佢情緒唔係好支持到，我諗係外界對佢嘅壓力，或者係佢對自己嘅期望。」又指即使之鋒後來升讀大學，「O-camp、O-day冇玩過，傾project可能網上傾完走，失去好多成長嘅嘢。」
張秀賢形容之鋒是天生領袖，「當時已經估到佢會成為世界級政治人物」；林朗彥就由最初行得最前，到後來分工刻意做幕後文宣、策略工作，「佢係最拋個身出嚟」；形容各人是哥哥、姐姐的鄭家朗亦最敬佩林朗彥，「佢從大學輟學，唔靠其他人，對社運前路有獨特看法」。在他眼中，之鋒有非常獨特長處，「基本上唔使瞓，夜晚3點催你做嘢，朝早7點又催緊，好意識到自己點為社運出力」。去年反送中運動之鋒多次接受外媒訪問，總能向不同媒體傳遞不同訊息，「對我嚟講，之鋒係將生命獻咗畀民主運動。同唔同意佢做法、立場係一回事，必須敬佩佢為民主運動嘅犧牲。」