2020年轉眼已嚟到尾聲，又係各大獎項出爐嘅時候，貴為五屆金球獎得主嘅祖雲達斯前鋒基斯坦奴朗拿度（C朗），日前就力壓效力巴塞隆拿嘅宿敵美斯，同埋上季協助拜仁慕尼黑成為「三冠王」嘅羅拔利雲度夫斯基，贏得今屆金足獎（Golden Foot），真係威到盡。
雖然個朵冇金球獎同世界足球先生咁響，但金足獎其實一啲都唔嘢少。呢個由摩納哥王室贊助嘅獎項，專為表揚28歲或以上球員而設，每個球員一世人只可以攞一次，評選並唔單憑球員當季表現而定，性質有啲類似終身成就獎，所以得獎者全部都份量十足。
自2003年設立以嚟，攞過金足獎嘅球星就包括巴治奧、舒夫真高、「大哨」朗拿度、迪比亞路、朗拿甸奴、托迪同伊巴謙莫域等等，而上屆得主莫迪歷亦一啲都唔失禮，今屆嘅最後10強人選就有美斯、羅拔利雲度夫斯基、利物浦翼鋒穆罕默德沙拿、巴黎聖日耳門前鋒尼馬、曼城射手阿古路同皇家馬德里中堅沙治奧拉莫斯等等，C朗能夠脫穎而出，絕對係莫大榮耀，而佢將會加入一眾金足獎得主嘅行列，喺摩納哥嘅冠軍大道留低自己嘅腳印。
大會今年又增設咗金足主席獎，表揚貢獻突出嘅球會主席，而首屆得主就係過去10年間帶領祖雲達斯贏咗17個獎盃、包括上季協助球隊創下意甲九連霸偉業嘅阿涅利。
雖然今屆金足獎兩個大獎都由祖雲達斯擸晒，但本年度歐洲足協最佳陣容50強名單，就可以話係德甲王者拜仁慕尼黑嘅天下，連同羅拔仔、紐亞、基拿比、湯馬士梅拿、京士利高文同艾方素戴維斯在內，呢支應屆歐聯冠軍一共有10個球員入選，佔咗成張名單五分之一，認真威水。上季首奪英超冠軍嘅利物浦亦有七人入選，當中包括沙拿、沙迪奧文尼、佐敦軒達臣、華基爾雲迪積克同艾利臣比加等等。兩大西甲班霸皇家馬德里同巴塞隆拿相對就比較遜色，分別只有兩隊嘅隊長沙治奧拉莫斯同美斯入選，至於C朗就連續17年入圍，有興趣嘅球迷可以喺明年1月6號之前，上UEFA嘅投票網站toty.uefa.com，選出心目中嘅年度最佳11人陣容。