今年疫情下最常做的事，除了戴口罩外，相信就是勤洗手。作為一介中佬，青冰近月都有抗疫後遺症，就是雙手爆拆，又紅又痕，除了要勤搽潤手霜外，也努力尋找相關港股，剛在星期一公佈業績的歐舒丹（973），正係食正條水。
受全球疫情打擊銷售，歐舒丹上半年收入下降15%，純利下跌37%，不過市場對業績就十分欣賞，股價翌日急升12%，創九個月高位。盈利倒退但股價不跌反升，看業績就要看細節位了。
管理層好識做，特別highlight了公司次季表現極佳，銷售額首季下跌22%，次季只係跌4%，釋出見底訊號。公司亦特別提到高端手部護理帶動了強勁需求，而線上銷售亦急升八成，佔總銷售逾四成，抵銷了全球大量銷售點關閉的不利影響。重中之重就是內地銷售按年強勁增長27%，銷售佔比亦升至16%，僅次於美國的18%。之所以咁勁，就係產品的線上銷售，全靠天貓及京東，前者有雙位數增長，後者更增長一倍。
上半年倒退，下半年能否扭轉乾坤，管理層都漏了些少口風，首先佢哋傳統上係下半年銷售勁過上半年，因為有感恩節及聖誕節等節日因素，青冰睇返過去三個財政年度，下半年盈利至少比上半年高3至8倍；在上月的雙十一活動期間，佢哋嘅護膚產品銷售較去年升超過四成，更在天貓平台裏身體護理及手部護理產品中排名第一。現時英美疫苗開發已經去到最後直路，如可全面開始接種，將對兩地的消費情緒有莫大幫助，而歐舒丹在英美的銷售額，共佔集團的總銷售30%，可說是疫苗受惠股。
內地市場增長勁，英美市場有轉機，有理由相信下半年條數更值得憧憬，如股價稍後借疫情反覆而回調，應是逢低吸納的好時機。
青冰