有車主用Be Water自訂車牌，運輸署話危險，唔批。車主與公務員一樣，以後或許先要宣誓，西環審批擁護基本法，才拎到有心思的車牌。
唔使試Shame on Carrie，實唔批，部門當然唔能夠指Carrie危險，個Shame字亦唔算冒犯，反正鄭月娥自爆「問心無愧」，愧字心中有鬼，自稱上帝感召的鄭月娥唔得閒與老公傾偈，每分鐘都在工作冇時間培養嗜好，唔慌係鬼古愛好者，這隻心裏鬼，再問下去，都係得個桔，甚至將提出問題者，送落地獄！運輸署唔係判官，建議車主，自訂加碼shame後加個less，啱聽吧，less is more，配合「我做錯咗啲乜？」的哽咽畫面，腦細就算黑面都冇合理原因DQ你。
即管試吓Cash is Queen，唔跳老舞唔夠資產入闊佬會所打牌的年輕人，窩在劏房睇「棋后」時會幻想自己住一間比禮賓府更大的獨立屋，唯一愛好就是咳晒銀行戶口，日日宅家數銀紙。冇dream car但訂一個發夢的車牌，差佬不會上門抄牌，告你洗黑錢吧。
有心人睇完《南早》，幫BTH的鄭月娥度身預訂兩個車牌：PK is Soft、Bill is Dead。花店接單，無懼限聚，直送和合石。