內地雲端服務發展迅速，對數據中心設施需求殷切，萬國數據（9698）作為內地嘅龍頭，按2019年收入計算，於中立營運商市場中佔有率達21.9%，收入增長達47.6%，而且專注於高性能數據中心，發展錢景同前景都唔錯。
集團自2011年至2016年度，泊到阿里雲及騰訊雲呢啲巨無霸戰略客戶後，持續增強對大型企業嘅專業服務能力，更與中國主要嘅公共雲供應商及互聯網公司保持緊密關係。
睇番艾瑞諮詢數據，中國數據中心未來會急速發展，喺2019年按收入計，中國數據中心服務市場嘅總規模達334億元（人民幣．下同），其中營運商中立市場為188億元，佔市場總額的56.3%。從2019年到2024年，中國營運商中立市場嘅年均複合增長率（CAGR）為31.8%，遠高於同期美國市場9.3%。
萬國數據今年第三季收入按年升43%至15.25億元，較市場預期高出4%及3%，其中服務收入按年增長44%至15.22億元。至於季度經調整EBITDA亦按年上升48%至7.17億元。集團擁有清晰定單能見度，提供予下游「基礎設施即服務」（Infrastructure as a Service，IaaS）供應商同時取得捆綁式優勢，料2021年至2025年可贏得大量定單，預期2020年至2022年的EBITDA嘅CAGR為41%，高於行業同期嘅30%平均水平。
集團客戶基礎強勁，在建機房中62.3%已獲客戶預先簽約，確保未來銷售及縮短回本期。數據中心服務嘅轉換成本高，大型科網企業均慎重選擇供應商，除咗確保數據中心嘅選址及性能外，亦要考慮未來擴張能力。所以萬國數據亦積極透過合資及收購擴張，最近喺北京通州區開發數據中心及收購北京順義區嘅數據中心。市場預料至2022年嘅收入會較2020年再累計倍增。
萬國數據近期股價於90元以下整固，待收集完成，成交增加配合下可再展升浪，可於87至89元收集，按大行目標價110元，先博重返前高位100元， 跌穿83元止蝕，較進取可按上市低位81元作止蝕。
古天后