【本報訊】曾被視為新希望的90後，如今成為階下囚。黃之鋒、林朗彥及周庭均是前學民思潮成員，亦是已解散的香港眾志始創核心，當年反國教擋下洗腦教育，但走過佔領和反送中等連場運動後，迎着他們的下一站卻是監牢。三人多年戰友及組織夥伴受訪，有人同樣身負莫須有控罪，有人走進社區尋找延續抗爭的任何可能，惟不約而同慨嘆「未來條路預咗好難行」；雖然都是廿多歲出頭，卻早已頓悟「我哋注定要做痛苦嘅人」，接受痛苦、無力、抑鬱，已成為港人的共同命運。
現任元朗區區議員張秀賢是學民思潮初代成員，曾出任發言人，跟黃之鋒、林朗彥及周庭識於微時，他受訪時正值教育局宣佈整頓通識科，形容訪問時機是莫大諷刺，「我被人認識原因之一係通識科考獲5星星，但由2012年推倒國教到今時今日，原來唔只冇成果、冇贏到，仲係嘔凸咁輸。」
他說參與社運，大家早有心理準備承受政權打壓後果，輕則留案底重則坐監，「以前仲有社會服務令，但之鋒單案（闖入公民廣場）後唔使幻想」，現時形勢更為惡劣，「個後果唔合乎比例，預唔到，唔會知自己做嘅事會唔會要坐監，唔知會坐幾耐，甚至無啦啦已經要坐（不准保釋）。」
他其實亦曾「半隻腳踩咗入去（監獄）」，是佔中案九子之一，最後只判200小時社會服務令，「坦白講我係好彩，當時有晒心理準備（坐監）」，惟因沒曾被囚反更感歉疚，「所以上年場運動要畀角色自己」，最後參選成為區議員，但深知議員工作亦「唔知仲可以做幾耐」，因隨時被DQ，今天區議員之日常亦要面對警方濫捕濫告，「頂到幾耐得幾耐，未來條路預咗好難行。」那他最終也難逃被囚嗎？張秀賢無奈點頭：「都可能係。」
三子另一八年戰友黃莉莉面對拘捕、審訊及監禁的抗爭夥伴早不計其數，年初她亦被指去年「7.1佔領立法會」中「串謀刑毀」被捕，受訪時雖笑意盈盈，卻說出一句：「我哋注定要做痛苦嘅人。」她指三名戰友為信念押上人生，特別林朗彥及黃之鋒兩人有案底，當極權打壓來到，承受後果便更大，如此循環如同無間道，「好似越做越多嘢，但打壓就越勁，我哋（所有手足）要承受嘅就越多，當個社會越努力、越多人覺醒、越多人願意出嚟，要承擔嘅痛苦同後果就越多。」
前學民秘書處主席鍾禮謙說，這輩抗爭世代不斷失去青春與自由，「我哋呢代爭取民主自由，係一個一個跳落海，幫後面嘅人鋪路。由我哋決定行呢步開始，唔可以話預咗，但有心理準備面對唔同壓迫。」這代人最初有學民，後來有學生動源、本民前等，形容大家努力嘗試從不同方面爭取，「和理非嘅咪學民囉，勇武抗爭咪本民前囉，都係希望爭取我哋相信每個人都有嘅權利」，無奈青年人不停付出和嘗試，政權的回應卻是離棄整代人，只着力「換血洗腦」。
不過，追求自由是人類天性，抗爭路前方縱只剩下監牢，卻未嚇倒後來者。已解散的眾志末代副主席鄭家朗是黨內最年輕成員，加入後即見證黃之鋒、羅冠聰及林朗彥等前輩相繼入獄，組織工作一度陷入真空，他要臨危接棒。
同伴接續失去自由，他更痛心下一個世代投入抗爭時，極權更惡更野蠻，「政府完全放棄咗香港人，走嘅走，入獄嘅入獄，自殺嘅由你死，維持政權穩定就得；社會窒息到係掩住你個嘴，唔係唔知點行下一步，係唔知有冇命行。」