今年10月18日是前HotCha成員黎美言（Winkie）33歲生日，本已相約胞弟黎嘉駿（Harry）慶祝，怎料生日前兩天弟弟卻由高處墜下身亡。痛失至親的Winkie憑着早年打拳訓練出來的堅毅迅速站起來，事隔不久已投入工作，透過在社交網追憶與弟弟自幼相處點滴。Winkie日前接受《蘋果》專訪，直言希望透過訪問呼籲大家主動關心身邊人，向情緒病患者送上鼓勵，讓Harry的離去更有意義。
撰文：寶妮
攝影：林賓尼
黎美言日前受訪時直言，自弟弟Harry離開後，曾在夢中相見：「我信佢𠵱家喺天家被神重用，做緊自己鍾意嘅嘢，佢有同我交代，叫我唔好再諗住佢，去做返自己想做嘅嘢，不過佢係擔心媽咪……」兩人的姊弟關係多年在圈中十分低調，她指公開對雙方未必有好處，Harry也想以個人實力在舞台劇界發展，但有部份Winkie的粉絲早知兩人關係，Harry曾私下感謝他們支持胞姊。若有來世，希望Harry繼續做她的胞弟、還是做她的哥哥？Winkie即笑說：「我想佢做我男朋友，我真係有諗過，因為佢又靚仔，人又善良又好單純。」
Harry是一個怎樣的胞弟？Winkie即心心眼說：「佢真係冇乜缺點，近乎完美，佢拍拖次數好少，對家人嘅忍耐超乎常人，媽咪係好大脾氣，但佢依然成日陪住媽咪。佢成日幫朋友，唔計錢銀，明知『豬頭骨』都唔介意，所以佢嘅追思會有300幾人嚟。」Winkie自我檢討，發現自己太預期Harry若有問題必會找她幫忙 ：「我出嚟做訪問主要係想為情緒病嘅人打氣及祈禱，𠵱家發生咗係事實，我喺屋企喊幾個月冇問題，但對件事冇幫助，我要將細佬件事更有價值，提醒大家要主動關心身邊人。 」
Winkie父母早年離婚，她指父母分開對仔女絕對有負面影響，這十年間她更對爸爸不聞不問：「但我去到事發現場見佢喊得好傷心，我對腳好自然行埋去攬住佢錫咗四啖，佢對我哋嘅傷害當日化開咗，但唔係完全放下。至於媽咪好慘，佢童年唔開心，婚姻又咁，兩個仔女冇咗一個，我有生之年會盡力畀最好生活佢。」現在Winkie不時聯絡父母：「事發後頭一星期我真係崩潰，因要照顧父母怕佢哋輕生，𠵱家爸爸穩定啲，媽咪比較起伏。」
除擔心雙親外，Winkie更要顧及Harry的朋友，她說：「因為真係有佢嘅朋友衝咗上天台，我要stop呢個惡性循環，我屋企人揀咗係咁，但我係唔鼓勵，我信細佬見我出嚟鼓勵人佢都會開心。」但有否嬲過Harry以此方式離開？Winkie說：「冇，我只係諗點解會捨得我哋，佢一定係去到好痛苦先咁做。」人總是失去才會珍惜，Winkie也不例外：「之前有錢我會先帶媽咪去旅行，成日諗細佬唔使咁快，佢會陪我到80歲，但原來人生唔係一定順序，𠵱家係最後生嗰個行先，以後我嘅生日唔會有佢，佢又睇唔到我結婚，我又睇唔到佢結婚，呢啲唔係言語可以講到嘅傷痛。」
Harry生前創立了「想出軌劇場」，Winkie現已接手營運：「佢有兩個劇本，同埋佢填過30份詞，講過想喺舞台劇界搵人再唱一次及出碟，我會幫佢完成。」但現實歸現實，Winkie的資金若只夠她營運創立的打拳減肥學校、今年開的小朋友培訓學校及娛樂公司，或者Harry的劇團，要擇其一時，會如何是好？她說：「我好理智，劇團係搵唔到食，所以我會揀自己公司，搵到錢先可以幫佢run劇團。」
場地提供：永輝拳會