有線裁員變地震，唔只引發大批同事集體辭職以示不滿管理層，至於涉事幾位空降嘅管理層，都畀人爆出唔少「威水屎」，好似日前有人流出未出街嘅李臻訪問特首林鄭月娥片段，俾777兜口兜面寸佢問題太「溫和」，不過講「威水屎」又點止咁少！佢哋呢班管理層多年採訪留低唔少「豐功偉績」，亦有一單半單傳到八方耳邊。
話說其中一個「高層」剛空降有線時，已經有爆料話佢當年返大陸出差，曾爆出骨場失蹤驚魂。當年呢個高層嘅電視台，原本協議好由佢入場拍攝，點知過晒時間都no show，同事只係知道佢前一晚去咗「骨場」考察，勢估唔到一覺瞓天光瞓到天昏地暗，到失蹤人口終於出現，自然被上司隔空照肺搞到流下男兒淚，尤幸當日有同團美女行家仗義拔刀，先可以完成任務交差，但邊估到犯過咁低級錯誤，最後都可以闖出事業新高峯？
八方又見到鍾劍華都有爆料話自己曾經誤撥呢位當日仲係記者嘅高層手提電話，點知換來對方聽筒另一端傳嚟連串粗口，但鍾就疑中留情話，唔排除係對方某個骨友代接而唔係當事人囉。
至於「高層二號」呢，有行家就講番咸豐年代古仔。當時教育官員干預學術自由係頭等大事，所以當年教育風波政府都礙於公眾壓力整咗個獨立調查委員會聆訊，而當年仲喺大台做緊記者嘅「高層二號」，採訪方法竟然係搵周公，如果佢有機會專訪曾國衞，兩個人應該可以開懷交流一下！
行家又同八方講，呢名「高層二號」咁神奇採訪秘技原來成日用，但瞓多過聽點報道？原來就靠事後搵行家駁料，同人講自己冇聽等打救。行家仲話，就算佢冇瞓着，好多時都會拎本小說出嚟睇，唔通就係因為咁所以文青化，於是訪問時會好mild唔夠硬？
李八方