【襲警案判更生】
【本報訊】聽障男生羅鎮傑襲警案裁決當日，旁聽席幾乎滿座，羅媽媽坐在最前排，前面是戴着耳機的兒子。她靜靜聽着裁決，每聽一句，眉頭就鎖得更緊。她曾經相信，香港執法者是公平公正，直至見證兒子從被捕到受審，屢受不公對待，才發現事與願違。她曾經相信，兒子即使有缺陷，也可過着快樂安穩的生活，直至見證他走進犯人欄，才發現法庭對聽障人士的嚴苛，「成個審訊都冇人當過我個仔係聽障人士。」
記者：黃健朗
羅鎮傑來自一個新移民的單親家庭，自小有過度活躍症，亦有言語障礙，五歲時父母因家暴問題離異，他要與媽媽分開，跟爸爸和爺爺生活。羅媽媽說，離婚雖擺脫了家暴，她卻被迫要與兒子分開，對兒子的思念、在異地的孤獨，最終讓羅媽媽患上抑鬱症，「我到𠵱家仍然覺得欠咗個仔好多。」
兒子12歲那年，前夫去世，母子終可團聚。她指鎮傑很孝順，年紀輕輕就懂得為媽媽下廚，拿手菜是蛋，不論煎蛋、蒸水蛋都有一手。兒子性格開朗活潑，兩母子閒時會打羽毛球、踩單車，簡簡單單過周末。
「2015年，有一日佢突然打電話嚟話：媽咪我個耳仔聽唔到嘢。」
兩母子在醫院間奔波，一星期看三、四日醫生，「做咗好多檢查都唔知乜事，醫生都解釋唔到，之後照到佢腦入面有一個水瘤，但都唔知係咪同失聰有關。」醫生建議做開腦手術，抽取樣本化驗，「我覺得太危險，唔想個仔做。」檢查顯示，羅右耳聽力120分貝，左耳90分貝，即近乎全聾，需要助聽器協助日常溝通。
像肥皂泡般，羅與世界的連繫沒有先兆地破裂，「自從失聰之後，佢就成日留喺屋企，冇朋友，唔敢去街，因為同人溝通唔到，人哋講嘢又聽唔到。」羅媽媽不諱言，兒子本身的病患，再加上聽障，與他溝通變得困難重重，「有時我哋會用書寫溝通，但都有困難，因為我接受嘅係簡體字教育，我唔識寫繁體。」有時大家不能溝通，兒子也會發脾氣，她唯有「盡量講慢啲、大聲啲，唔可以急，聽唔到就貼近佢耳邊講。」
儘管有缺陷，但羅媽媽指兒子率真善良，記得2016年與兒子在東莞不慎被偷了銀包，「我好唔開心好嬲，個仔同我講『媽咪，你唔使嬲，等我大個仔，我做警察捉晒嗰啲壞人。』」話到一半，羅媽媽堅定說：「所以我從來唔相信我嗰仔會襲警。」
怎料案發當晚她接到差館電話，說她的兒子被捕，「入到去（接見室），見到佢臉、頸、膊頭都有損傷，對眼又紅晒……佢好驚，唔敢講嘢。」警員要求羅抄寫文件，解釋不是正式錄口供，又說「男子漢大丈夫，做錯要認……」、「我細個都好曳㗎……」、「可判社會服務令、感化令……」她從未聽過這些艱澀的法律術語，「我以前以為警察唔會呃人㗎，到今時今日先知，原來唔係。」
回想審訊過程，她憤然道：「成個審訊冇人當過我個仔係聽障人士。」羅媽媽解釋，兒子除了聆聽，也需要依靠讀口形去理解對話，當法庭上所有人戴上口罩，他只能依靠耳機，「我正常人坐喺下面聽，都唔係完全聽得清楚，何況係一個失聰嘅人？」可是法庭從未查問羅的聽力水平。「佢（裁判官）根本冇仔細聽過我嗰仔講嘢。我記得主控問佢好多，佢都答唔同意，就係唯一嗰日嗰條答錯咗，就否決晒所有嘢。就好似一個考生考試，十題入面錯一題，零分不單止，仲以後無得再入試場，剝奪佢成世人嘅權利。」
羅鎮傑還柙期間，羅媽媽幾乎每天都去探望，來回四小時，只為了見15分鐘。「佢多數都會叫我唔好咁辛苦，唔使日日探佢……其實我好擔心佢畀人蝦。我叫佢遇到乜事都要冷靜，千祈千祈唔好同人有磨擦。」兒子曾表示對審訊結果很不忿，羅媽媽無奈道：「你唯一嘅錯，就係唔應該喺嗰日、嗰個時間、嗰個地方出現。」
兒子被定罪後走進犯人欄那刻，她沒有哭，只給了他一個眼神；但昨天兒子步入覊留室前大聲跟她說生日快樂，她終於忍不住痛哭起來。