施政報告出台後，教育局長楊潤雄見記者闡述改革通識教育方向，聲言要加強學習憲法、基本法，學習國情。主要改革有：（一）不再用通識教育名稱，新名字仍未想得通，大概係唔敢叫做國民教育，於是要搵新名稱，（二）保持必修，（三）不計成績，只分及格不及格，（四）刪減課程內容，剩番五成，如何刪減，未有詳情，（五）不設專題研究IES，（六）重視正面價值觀，學習國家發展、憲法和基本法，（七）學生可到內地考察，（八）新科目設教科書審批，設適用書目表。
經此八大改動，現時之通識教育科實際上名不存，實滅之。
奉勸報讀各大學通識教育碩士課程嘅在職教師，快啲退學，慳番學費好過冬，將來通識科教員分分鐘有一半失業，如在大學讀緊通識學士課程嘅，快啲申請轉系，不能轉就加強副修課程，唔駛擺咁多時間落主修科。明年考DSE嘅中六學生，千祈唔好報讀通識教育學士課程，否則浪費四年光陰，畢業即失業。董建華李國章羅范椒芬全力炮製之通識教育科已經由港澳辦中聯辦指揮林鄭一刀斬首，由楊潤雄做劊子手了。
唔理通識教育如何改革，最殺死學習嘅一招就係不計成績，只須及格，無論讀得幾好，考得幾標青，都攞唔到5**，大學收生以後根本唔會理呢一科。以香港學生之醒目，中學校長之一切向成績看，讀書就是求分數嘅DNA，讀必修科通識一定會係咁意就算數，以後考中國憲法、國家發展、基本法，容易過鬼啦，一味背誦梁愛詩譚惠珠之八股，考評局一定唔敢將學生肥佬，一定畀及格。既然如此，名校會起碼裁走一兩位通識教師，或者由中史科老師兼教，照本宣讀經審批之教科書就算數，以後香港中學生再不懂得講批判性思考及獨立研究課題。北京以為如此改革通識就可以避免學生反共厭中，蛻變成為港英奴化教育預期嘅愛國學生，自願上京學習（如林鄭讀港大時），是否一定掂？未必㗎，有傳媒毒草影響吖嘛！睇嚟在政治上清零，完全排除議會泛民聲音之外，下一步就係收服全港傳媒，招安有之，打壓封舖有之，將香港媒體環境變成新加坡模式，咁就真正靜音太平咯！