今年9月，有線新聞部突然空降一班管理層，前無綫新聞副總監許方輝為新聞及公共事務副總經理，前新聞工作者李臻和亞視前新聞及公共事務副總裁陳興昌則空降出任新聞總監，佢哋入主之後，最叻就係炒人同整治員工，噚日仲搞到有線新聞部大批記者同主管集體辭職以示抗議。不過，原來呢樣未算係佢哋最叻，最叻係討好權貴，好似李臻早排訪問特首林鄭月娥，連777都不屑李臻問題太「溫和」，仲兜口兜面寸佢！
本報收到李臻早前專訪777時，一段未有播出街嘅片，應該係訪問完咗第一節，第二節未錄影前，777同李臻閒談，當時777帶少許不屑批評佢訪問技巧：「你問得咁Mild（溫和）嘅？」然後擰側頭正眼都唔望李臻。
呢個時候李臻即化身「小李子」，一邊尷尬陪笑、一邊答777：「嘻嘻，嚟緊第二節就會……嚟緊第二節就會（問）硬淨啲㗎喇，嘻嘻。」而777好似老佛爺上身咁答：「唔怪得之我新聞秘書話，哎！（有線）好合作，好合作，好配合，好配合」。
八方睇到呢度真係冇眼睇。身為一個記者，畀受訪者「讚」問題「溫和」、「好合作」、「好配合」，仲要「讚」嗰個係777，呢個等同對新聞工作者嘅最大侮辱！李臻見777連正眼都唔望佢，冇火不凸止，就只會尷尬陪笑，難怪有前有線行家睇完破口大罵，仲話如果佢畀777咁形容，佢會撼頭埋牆死咗佢算。
李八方