組合MIRROR日前接受《蘋果》訪問互爆隊友私隱，不過言談間可看出眾人的默契與感情。隊長Lokman說：「其實𠵱家同初初最大分別嘅係默契，我哋講嘅嘢會越嚟越似，亦好快會sense到大家諗緊乜。」Alton笑說：「開頭大家客客氣氣，𠵱家就話之你，有乜事就會推對方去死。」
眾人越講越起勁，再爆當日不在場的姜濤、Edan和Ian兩年前參加《造星》時，大家在美國集訓時的秘密。AK說：「姜濤係一個好勝心好強嘅男仔，去到美國集訓開頭唔係咁熟，但打機就會見到佢另一面，佢會忽然小朋友上身咁大叫：『Yeah！who’s the best who’s the best！』」Stanley也說：「佢成日唔記得嘢，仲有唔好畀佢見到任何反射嘅嘢，佢會對住啲反光嘅嘢執佢前面嗰條頭髮，如果趕時間就大鑊。」
原來Edan也發生過一件「大」事，眾人起哄逼Jeremy爆Edan大鑊，Jeremy說：「美國訓練嗰時，佢有朝早開大，塞住咗，搞唔掂，之後我幫佢搞掂咗。就係咁啦，呢件事講足兩年。」AK說：「嗰陣我哋大家都冇執床，因為太攰關係，不過Edan張床係特別亂，永遠都有啲衫呀，底褲呀喺晒張床上面。」AK就爆Ian雖然是排球運動健將，但原來怕水：「聽過好似話佢細個同阿哥玩水浸親，自此就好驚水，我哋早排玩wakeboard佢都唔肯玩。」