【姐匙Talk】一折哥為箍煲向女友落降

大台中藍到爆嘅「一折哥」，過去一年喺網上發表對政見言論，惹嚟網民鬧爆，一折哥一於好少理，享受自己喺藍圈子埋堆，繼續圍爐取暖。一折哥自從表態後，好似自己撕破假面具咁，聽返一折哥以前唔少惡行，原來佢以前追女都好多古靈精怪嘢，聽完真心嚇人一驚。

養鬼仔催旺事業

Jessie聽聞一折哥份人好大男人，邊個女仔同佢拍拖都受到嚴格看管，唔准女友做好多嘢。有次一折哥撻着咗同台小花，女友唔小心犯禁，一折哥就立即鬧爆，小花當然唔甘心被鬧，就衝口而出要分手，不過一折哥死都唔願分手，雖然佢出力箍煲，但小花未有心軟，一折哥就出絕招向小花落情降，一個大男人竟用啲咁嘅陰招，留住已經唔愛佢嘅女友，好彩小花都命硬，未有俾情降箍實，不過聽完就覺得好心寒。仲有人爆料話其實一折哥份人係超級迷信，仲有為催旺事業而養鬼仔。相由心生，唔怪得佢個樣越睇越唔正氣。

自從一折哥被認證係藍絲後，形象插水，廣告商都驚受到牽連而同佢割席。一折哥始終要孭起頭家，惟有碼實公司班話事人接多啲劇，希望有機會北上賺人仔搵食。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。