特首林鄭月娥視為瑰寶嘅港版國安法，喺好多人心中係白色恐怖，更係政黨、政治人頭上一把利刀，不過一班民主黨新生代就無懼政治打壓，透過組織新一屆民主青年，希望一齊行出第三條路，就係留低、走返社區線，化整為零，路線不變但方式變，希望將地區工作年輕化，更挑戰林卓廷出選民主黨副主席。
佢哋噚日舉行傳媒茶敍，主席陳堡明話，新一代冇所謂「鄉下」，佢哋嘅鄉下就係香港，佢見到好多人想移民、政府好想送大家返大灣區，但其實有第三條路，就係堅守香港，民主青年會將民主黨本身做區嘅優勢發大，形容係社區工作青年化、青年工作地區化，認為要將社區概念諗得活潑啲，好似搞團購撐黃店等都係可行嘅做法。
民主黨下月6日會召開周年會員大會，選出新一任領導層，民主青年都有六名成員會參選，其中兩人包括觀塘區議員梁翊婷、沙田區議員冼卓嵐，就會同啱啱辭任立法會議員嘅北區區議員林卓廷三個人爭兩個位，陳堡明話當然希望民青一眾人可以當選，其他成員亦都話講緊黨內年輕化之際，應該畀個機會年輕人表現，畀公眾睇到民主黨新生代都準備好。
李八方