中美貿易戰未平，中澳貿易戰又起！繼牛肉、大麥、煤炭後，中國再對澳洲葡萄酒出手，今趟徵收高達212.1%關稅，澳洲表明告上世貿。半個月前，東盟10國連同中日韓澳紐先至簽署RCEP，號稱全球最大自由貿易協議，中國轉頭就向澳洲徵收關稅，點叫人對RCEP有信心呢？
本來喺RCEP下，港口航運相關股份食正條水，話晒RCEP成員國舊年區域集裝箱貨量佔全球貨量26%，未來關稅減免，貨物貿易增加，勢成行業增長動力。事實上，東方海外（316）、中遠海控（1919）、中遠海運（517）亦炒咗一轉。不過，如果RCEP簽完就變廢紙，咁就喎呵！
對投資市場嚟講，中澳糾紛，相對中美，係蚊髀同牛髀。美國眾議院將於當地時間周三表決《外國公司問責法》——可強制中概股除牌嘅法案，更令市場關注。周一，中港股市分別跌0.5%同2.1%。恒指收26341，觀乎11月已連升四周，累升約一成，回調整固都係正常。
本港爆發第四波疫情，收租股同房託基金（REIT）又冇運行。領展（823）連日下跌，周一收68元，但仍守穩長期上升軌，短期回吐或係低吸機會，畢竟疫苗快將面世，疫情遲早受控。領展早前公佈中期業績，收益同物業收入淨額只係分別按年減少1.9%同0.8%，算好硬淨。集團中期可分派總額按年跌1.5%，但每基金單位分派則升0.1%。睇返過去5年全年派息紀錄，分別派發2.0618元、2.2841元、2.4978元、2.7117元、2.8719元，年年增加。領展現價股息率為4.23厘，根據《彭博》，今明兩年預測息率為4.27厘、4.35厘，高過銀債保底息率3.5厘，唔夠年齡買銀債可諗諗。
割柑人