林鄭月娥第四份施政報告厚56頁，有167段，都幾長氣。林鄭在立法會慢慢讀，難怪政制及內地事務局長曾國衞聽到瞓着去見周公，張華峰議員索性利用時間去訂大閘蟹，當日（11月25日星期三）早上股市急升，去到11點升咗近450點，但林鄭一開口，股市就向下跌，唔知同內容沉悶有關吖還是金融界議員、著名券商張華峰發出沽貨暗號呢？買大閘蟹噃，股市之迷信忌諱也。做慣校長嘅李國章就「上堂」玩手機，唔聽林鄭「校長」講書，認真頑皮，記唔記得呢班建制派曾上深圳聽習近平發表談話，人人揸支筆做筆記呀！點解咁敬畏習主席，竟然當林鄭冇到？簡單之至，人人都知道習近平先至係大波士，林鄭何須放在眼內，曾國衞可以直通國家政要，唔使睇林鄭面色啩。
長篇大論嘅施政報告，好似內容多籮籮，其實只係勾劃出兩個政治大方向，一個經濟主軸，其餘只係配菜，甚至連增闢土地、增建公屋嘅頭等民生大事，都只係例牌功課，「做得到固然好，做到六七成都叫做交貨」，總之公屋數量有拖冇欠，長命債長命還。
大方向與主軸就要認真緊張嘞，中央睇到實，交唔到差就唔好連任特首。一個大方向係政治清零，視泛民反對派為新冠狀病毒，務必清零，今年已推遲立法會選舉，逼泛民退任，泛民醒目留在議會，於是露出真面目，由人大常委斬人，不惜在全世界面前暴露一國兩制之虛偽面。立法會內已清一色建制派話事，意猶未盡，施政報告還要提出修改條例，由特首監誓議員法官，必要時可即席判斷宣誓無效，無需解釋。即是特首一人同時規管司法、立法界人員就職，大權獨攬，完全將反對聲音清除。第二個政治方向係整頓教育，大改中學通識教育，不列通識成績，只列及格與不及格，大學收生就無咗通識科分數考慮，以後中學生邊會花心機於通識科吖，林鄭變相殺科，改通識為內地情況教育。
經濟主軸就係大灣區融合，一切金融創科發展，皆強調與大灣區掛鈎，互聯互通，中資基金及投行必然勢力大增，本地中環精英及大學生如果唔跟風做順民，以後冇得撈。如此一來，豈不天下太平？