特首林鄭月娥呢排幾乎日日接受訪問，已經日日好似上身咁話自己冇錯、問心無愧，到日前佢接受《南華早報》專訪，除咗繼續一貫堅持自己冇錯之外，仲爆逆權運動期間，有身邊嘅朋友同同事逼佢做「佢覺得唔正確」嘅事，又大爆自己同老公林兆波已經冇偈傾好耐，成為咗工作狂喎。
林鄭喺訪問入面，繼續堅持自己唔覺內疚，覺得自己冇做錯，唯一錯嘅，可能係佢同團隊對《逃犯條例》解釋唔充份，公關亦差，仲話自己喺反修例運動入面受盡創傷，尤其係身邊嘅朋友同同事，喺嗰時逼佢做啲「佢覺得唔正確」嘅事，例如調查警察，可惜嘅係777竟然無透露邊位咁斗膽脅迫年年考第一嘅香港特首，畢竟「脅迫港府圖實現政治主張」直情有犯國安法之嫌，唔知777有冇偷偷地用國安處嘅微信舉報熱線，將別有用心之人繩之於法？
不過一切已過去，777話佢𠵱家信心返晒嚟，仲話做返自己，除咗工作之外，乜都唔會做，仲要無愛好、消遣活動同娛樂，仲要話自己「甚至冇時間同丈夫聊天」，即係連老公都唔理！不過，八方翻查2017年777參選同當選特首嘅報道，發現低調嘅林生寫過情信畀777，希望重溫外遊、睇戲、行街嘅甜蜜滋味，又有報道指佢哋晚晚講電話維繫感情，777曾經話：「官邸那麼大，有時夜晚自己一個人，冇人陪看電視，都真想有個膊頭挨下。」可憐林生嘅膊頭今日已不為777所稀罕，林生何辜？777𠵱家只係話：「家人完全支持我，除此之外，我不想詳細再說。」睇嚟，婚姻諮詢都可以慳返嘞。
李八方