【本報訊】在基建概念下，屯門樓前景似乎一片秀麗，資深投資者林一鳴卻分析指，區內樓價未來升幅未必很大，「因為佢始終唔係通去市區，只係通去機場，當然如果好似沙中綫咁樣，4、5個站可以去啲大家返工嘅地方，例如金鐘等，對樓價就有一定優勢」；而且不是港鐵，只是一條路，「你話係咪好多人住喺屯門佢想去搭飛機？咁現時呢個時候當然唔係啦，基本上都冇人搭飛機」。因此，林預計屯門至赤鱲角連接路通車，對屯門樓市不會起太大刺激作用。
林一鳴反認為屯赤隧道通車，或會利好內地樓市。他以港珠澳大橋通車後為例，東涌樓市未見受惠，「益係益咗珠海嗰邊樓價」，多了港人在珠海置業，「但係你話會唔會有啲大陸嘅人佢因為咁而買咗東涌呢？從來都未聽過，更加唔會買屯門」。
有數據指過去十年屯門樓價勁升逾兩倍，他指該區近年樓價升幅大，是與區內集中細價樓有關，在政府辣招下，過去十年屯門區食正細價樓升浪，加上挾基建效應，令樓價水漲船高，由100萬多升至4、500萬。他預計，明年住宅樓價會橫行，住宅租金則跌一成，寫字樓及工廈價格下跌10%至15%，商舖跌幅更高達20%。