特首林鄭月娥呢個星期自high式講完《施政報告》後，接受咗好幾間傳媒訪問，佢日前自爆因為被美國制裁，原來唔只冇得用信用卡，連銀行戶口都冇埋，仲好自豪話每日都係用現金，買所有嘢都係畀cash，甚至連政府出糧都係用銀紙，所以有大量現金喺屋企。呢個訪問一出，不論黃定藍嘅網民都熱烈討論，好「關心」777點樣喺普遍用電子支付嘅社會下齋用現金生存；藍絲網民就關心祖國銀行為乜唔支持777，向美國敵對勢力屈服。
777話連銀行戶口都冇，要用現金度日，有藍絲網民即刻問，點解佢唔去祖國銀行開戶口？講明國家係唔會向無理境外勢力屈服，中銀應帶頭為777開戶口，以示美帝制裁根本係冇用嘅！又有人問銀行咁樣配合外國勢力對付特首，仲唔係違反國安法？不過𠵱家情況，明顯連一眾中資銀行都驚被美國金融制裁，所以唔受777開戶，班藍絲網民又點會唔失望呢？
至於黃絲網民關注活喺2020年香港，當有屋邨街市都只收電子貨幣，777係咪真係可以只用現金生活？八方睇返777喺行會嘅利益申報，家陣仍然係馬會同香港會會員，就令人有興趣想知究竟佢係咪會、或者已經係拎住現金去交會費呢？黃絲網民亦有興趣知佢會點交稅，777曾經因為買唔到廁紙，而喺便利店留低不快回憶，不過今次便利店就幫到佢，因為有現金繳付稅款服務，但每次上限只得5,000蚊。
李八方