【本報訊】疫情下人人都是大廚，食品需求增加、推升超市生意。盛滙商舖基金創辦人李根興表示，近期民生性質行業如食品超市搶佔地舖，「你見買舖都係同街市有關；沽舖就係零售」；他指佳寶、祥興等食品超市贏在薄利多銷、價格便宜，與大型連鎖超市營運路線不同，「逆市下賤物鬥窮人，經濟差就有利這類型超市」。
不過李根興直言，食品超市「開得過龍」，「因為唔止街市開，屋邨樓下開都得，𠵱家遍地開花；逆市開分店嘅浪潮至少去到年尾，明年農曆新年會係最高峯」。
惟李根興預期，一旦肺炎疫情過去，該些超市會陸續關閉分店，「到時市民可以外出食飯，唔使買餸煮飯；旅遊開關，遊客亦唔會去街市。同時租金上升，就有可能執笠」。
利嘉閣地產商舖、商業及投資部高級營業董事鄭得明亦表示，佳寶等超市近期積極擴充，不停買舖，「佢哋對象主要係本地生意，𠵱家疫情下塘水滾塘魚，專營本地消費營商能力較強勁，超市食到正」；他又指，商舖在街市附近開舖有生意保證，但亦留意到部份小型超市嘗試做「開荒牛」，在較遠離街市地方開舖，嘗試開拓各路客源。