關於777，相信無數香港人堅定認為罄竹難書，佢由以前「好打得」變「好吹得」，最新技能解鎖，係變得超級厚顏。發表完份《施政報告》後，佢吹到份報告天上有地下無咁好，最新版本係形容份《施政報告》「平穩落地」；送中條例搞到過去一年香港人水深火熱，佢竟然講得出話自己問心無愧，對香港建設多過破壞，仲話如果有一絲有愧，就好難繼續服務香港喎。
777接受電視訪問，被問到《施政報告》反應一般，佢竟然反轉嚟講，話代表冇特別措施成為攻擊點，係「平穩落地」；講到逃犯條例風波，佢又可講到唔關自己事咁，話問心無愧，當問佢係咪搞到所有深層次矛盾「擺上枱面」，佢又可以話如果有深層次問題就唔應迴避，仲形容自己對香港係建設多過破壞！
其實《施政報告》係咪冇反對聲音，睇公眾畀嘅評分創出新低，仲有過半數人畀0分，只係777扮睇唔到。至於佢話問心無愧，八方仲記得，舊年6月18日市民因反送中上街後，777話經過反思、反省，「向每一位香港市民作出很誠摯、很真誠嘅道歉」，但原來道歉背後係一顆無愧的心，好彩當日香港人集體唔信佢兼唔收貨囉。
李八方