大學時跟張亨利先生學跳社交舞，畢業後極少練習，舞技早已生疏生硬，花巧之處更忘得一乾二淨，還好記得住張先生所講之做人道理及男女相處之道，一生受用不盡，譬如佢講：「你地大學生拍拖，不妨諗清楚（一）要搵情人柯德莉夏萍，談情說愛，夜遊淺水灣漫步沙灘吖，還是搵碧姬芭鐸小野貓，一見面就想到上床吖，還是想搵一個白燕型賢妻良母呢，男人通常發夢三個都要，或者幻想搵到一位三合一，發吓夢好嘞，如果發達前後要齊三女，必定悲劇收場！」幾十年前，張先生在上海時早已睇透，今天上海香港富豪，不少係想要二房三房再外加情婦嘅，卒之自找麻煩。
午飯時，賓架P介紹我地去香港圖書中心買一本The Last Kings of Shanghai讀吓，增加對1920、1930年代上海之了解，本書主要係講述上海之洋人大富豪沙宣與嘉道里家族之發跡緣由。沙宣而今冇乜人知，只剩下一條香港沙宣道，嘉道里去到第三代，仍然係香港著名富豪家族，沙宣與嘉道里都係波斯猶太裔，從中東走到中國找尋機會，卒落腳上海投機、投資發大達。賓架P話本書之一個精闢觀察就係指上海係一個特殊地區，一國四制，起碼有華界、英租界、法租界、日租界，外商在上海發展經營，有外國法律制度支撐，故此生意得以發展壯大。左丁山謂：「咁就十分政治不正確了，今天講吓都捱批！」賓架P話：「講吓歷史都有罪？」唉，總之要小心，費事畀人舉報，賓架P催促：「食完飯你快啲去買番本The Last Kings of Shanghai讀吓。」唉吔吔，現已進入一國一點五制，就快一國一制時期，仲可以參考沙宣、嘉道里咩！
唔講十里洋場舊事（左丁山一輩只係靠睇書識得皮毛），講番現實，賓架P話香港會、馬會、婦遊會都因有確診者到訪，要關閉兩至四日消毒，叫我地出入小心，結論就係呢排最好晚晚返屋企食飯，盡量減低風險，以前有慈雲山群組、慶回歸群組，與中環高層無關，點知出現一個跳舞群組，有高盛私人銀行大姐Helena Koo確診，就令大家震驚，顧小姐係前獲多利高層Lydia Koo嘅表姐，私人銀行界極資深人物，與謝玲玲、胡太、邱太等皆出入高級會所，上流社會冇法子唔驚傳染！陳肇始慣咗獨居，怕對此冇乜深入認識了！