上海申花上周五喺卡塔爾進行亞冠盃分組賽，中場秦升喺比賽中飛鏟對手迪亞高奧利華拉致對方足踝變形，但呢吓「收山腳」走甩咗紅牌，球證只畀黃牌警告。不過，申花最終仍以1:2輸俾FC東京，後者超越申花升上F組第二位。賽後，秦升喺維基嘅個人資料，一度被加上「殺人王」稱號，有中國網民更建議判罰佢終身停賽。
下半場初段，迪亞高奧利華拉喺右路連過三人，秦升從後飛鏟奧利華拉右邊小腿，慢鏡重播可以見到奧利華拉右足踝變形，結果呢名巴西球員未能繼續比賽，要由擔架抬離球場，由原大智入替。秦升呢次飛鏟只被球證出示黃牌警告，佢雖然僥倖走甩紅牌，但申花之後先後喺61同82分鐘失波而以0:2落後，基奧雲尼摩蘭奴86分鐘為申花追成1:2，但始終未能平反敗局。
秦升呢吓「收山腳」受到中國同日本網民狠批，除咗話佢係殺人王，有中國網民甚至指佢一啲悔意都冇，唔配做足球員，有人甚至寫「建議終身禁賽」。事實上，34歲嘅秦升可謂劣迹斑斑，包括2013年效力廣州恒大時，將貴州人和外援梅斯連莫域踢到鼻骨折；2017年效力上海申花時，因故意踩天津權健外援韋素而領紅，更被中國足協判罰停賽半年同罰款12萬人仔，最近一次喺上季效力大連一方時，首輪聯賽就將河南建業嘅巴西外援多拉多踢至腳脛骨折而提早收咧等等。
另外，上周六G組，賽前2戰僅得1分嘅FC廣州（恒大），面對已經出線嘅日職球隊神戶勝利船，藉泰利斯卡同入籍中國嘅艾克森各入一粒，以2:0擊敗對手。恒大全取三分後升上G組次席，不過下周二煞科戰會對水原藍翼，一旦落敗將出局，被傳帥位動搖嘅主帥簡拿華路仲有好大壓力。