張敬軒紅館騷演唱會今晚來到尾場，前晚軒仔就邀請了被他一手捧紅的工人「遮遮」坐VIP位睇騷，其間他與「遮遮」的互動令全場爆笑。
軒仔前晚穿上喱士通花西裝出場，唱完《桃色冒險》後就展示「肉背」，並說︰「畀個背脊大家睇吓先！呢件都算係我紅館開演唱會最少布一件衫，我唔係偶像派，多得食姐姐啲麵包白粥，食到個背脊瘡都冇粒！」軒仔續說︰「未加場前今晚係尾場，我請咗好朋友、家人嚟睇。」歌迷大叫︰「遮遮。」軒仔隨即介紹坐在VIP位的「遮遮」，「遮遮」聞言站起身向全場打招呼，之後更「揮動」一袋麵包向軒仔示意，令全場爆笑鼓掌。軒仔笑問︰「What？No bread again！啲包係for breakfast or 消夜？ 」
之後軒仔表示「遮遮」原本是請來照顧父母的︰「佢之前一直照顧開80幾歲婆婆，最初來到佢有問我，sir，我好耐未照顧過teenager！你有乜想食？煎蛋？煎腸？嗰啲大家都喺網上見到啦，佢雖然唔係我心目中朝朝畀個半島早餐我嘅工人，但當我影完佢煮嘅早餐，真係為好多朋友帶來歡樂。」台下「遮遮」更好奇地問：「Sir is very popular singer in Hong Kong !（Sir是香港很受歡迎的歌手）」、「Sir sing very good。（Sir唱得很好）」前晚個唱完畢後，軒仔再於Ig上載一袋麵包的相片，並留言︰「多謝大家支持，有乜事我出返去食塊包先！」又hashtag「阿遮今晚踩場，完勝。」
「遮遮」是軒仔上月新聘請的工人，因軒仔連日來在社交網分享她的「創意早餐」，再加上軒仔的爆笑留言，令他被稱為「早餐界KOL」。而軒仔的「出色」早餐包括「炭燒牛角包」外，更有「煎燶香腸加粒粒臘腸」配「瘀黑生番茄」等。
另外，演唱會安歌部份，軒仔又替男歌迷向女朋友求婚成功，軒仔更拿出印有「軒」字的利是封說：「我好傳統，一對新人要利利是是，唔知可唔可以出席你哋婚禮，提前畀封老毛你，有我親筆簽名！」更以歌曲《找對的人》送上祝福，令場面溫馨感人。
