地方官接受有線電視台訪問，自己爆自己內幕，我們才知道原來她沒有銀行戶口，政府出糧支付現金，屋企收埋大把銀紙。請注意，此嫗月入四十三萬港幣，如果收的是一千蚊紙，每月就是四百三十張，以她知慳識儉的性格，不論紅事白事，着嚟着去都係嗰件粉紅色旗袍外套，肯定不似《紫釵記》的霍小玉那麼疏爽，應該冇「觀音三萬，皇母三萬，如來又三萬，只怕死無銅棺可殮」的後顧之憂，每年五千幾張金牛積積埋埋，可想冚家滿谷滿坑，陰騭嘢做得太多半夜驚有冤鬼上門索命瞓唔着，捋起衫袖熨銀紙，熨到手軟都熨唔晒。如此公然炫富，簡直引狼入舍，小偷大盜見有咁大嚿肥豬肉，不動腦筋爆竊才怪，勿以為官邸守衛森嚴就很安全，連堂堂白金漢宮都曾經被路人甲成功闖入，而且不止一次哩，不信請參考《王冠》第四季，睡眼惺忪床尾坐咗個蒙面陌生人，我真係戥佢飆冷汗。
不過拜讀了馮君昨天專欄《劫財不劫色》，憂天的杞人馬上放下心來——學貫中西的芳鄰指出，正常嚟講賊也有專業操守，不會窮心未盡色心又起，但香港咁反常，怕且逆道而行，上樑既然不正，下樑哪有不歪的道理，賊阿爸埋班做世界，十居其九會開出財色兼收的苛刻條件，嘍囉一聽魂飛魄散，口味再重也不敢接訂單。大佬呀，入屋見到個穿粉紅色睡衣的阿婆，滿頭髮卷鴛鴦三角眼陰陰濕濕上下掃射，仲要失驚無神發出陣陣痴笑，唔係「化咗灰都認得你」，而係「唔化妝都認得你」，食定半打偉哥都無法迎難而上吧？重賞之下沒有勇夫，家宅可保平安，阿門。