露雲娜匆匆由旺角趕來尖沙嘴訪問現場，她剛剛完成了到唱片舖的「謝票」活動。今時今日，有心出實體唱片，還要到唱片舖去，幾乎都要致最高敬禮。尤其，唱的歌者，是個五歲已經出道，唱了超過半個世紀的露雲娜。
「傳說中有個女王在世上……」這句歌詞幾乎是70後都識哼的集體回憶，發過《荳芽夢》的露雲娜，到了今天依然在唱，訪問期間她笑聲不絕，提起她的翻唱碟，唯一一首新歌《Forever》，問她何謂永恒？露雲娜忽然感觸哭出來，「我好幸運，我可以留低我把聲畀人聽，譬如有一日，譬如露雲娜有一日唔喺度，譬如我走咗，我留咗我把聲喺度呀……」
五歲出道，今年57歲的露雲娜，歲月卻沒有在她身上留下殘酷痕迹，她依然是當年那真我，那個愛唱歌表演慾很強的混血小妹妹的初心一樣，「我覺得我好lucky，我可以留我把聲畀大家聽，我可以錄唱片，可以錄低把聲畀大家一路聽住。」
千帆過盡，原來最緊要有氣有力繼續唱。
撰文：文嘉龍
全翻唱的發燒碟，由最遠古林憶蓮和Blue Jeans的《下雨天》、陳百強的《深愛著你》，唱到方皓玟的《你是你本身的傳奇》和Supper Moment的《飛》……露雲娜說聽了成千首歌選出十首，「《下雨天》唔係特登搵㗎，突然間喺我news feed出現，我又再愛上返呢隻歌，好得意個感覺！我記得返當時好似係17歲，落緊雨聽，嗰時我啱啱同男朋友分開，佢唔要我呀！」
露雲娜說，很多人都估不到她會揀上Supper Moment的歌來翻唱。一隊2006年才出道的樂隊，相比五歲已經入行的露雲娜，如換了幾代人間，「我好鍾意佢哋啲歌，好creative好original，個個都話估你唔到Rowena會揀Supper Moment嘅歌嚟唱，《飛》嘅歌詞係好有hope，充滿希望！」
這張碟更加是她和音樂人老公Perry Martin的心血結晶，既是老公又是製作人，不會為工作而拗撬？「我哋個communication好好，唔鍾意我就會出聲，所以唔會有嘢擺喺心入面，我哋好民主，真係冇乜拗撬，我哋唔會嬲住大家去瞓覺囉！如果有人問我，你同你老公有冇嗌過好大嘅交呀？真係講唔到畀你聽有，因為真係冇，係咪好『悶餅』呀！哈哈！但係我覺得好舒服，可以同一個人咁樣生活。」
關於露雲娜和Perry Martin的奇緣，這是露雲娜的第二段婚姻，她18歲唱《荳芽夢》時，男方已經同場為她彈結他伴奏，奈何當時兩人身邊都有另一半，相隔30多年，兩人在facebook重新聯絡，Perry留下一句：「Remember me？」展開追求，Perry更為了所愛放棄在美國的一切，來港陪伴露雲娜，兩人在2013年結婚。
不要以為露雲娜和老公都鬼聲鬼氣，兩個人都深信有前世今生這回事，「我信！好好笑，我老公成日同我講，佢覺得佢以前（前世）點樣識我呢，佢去學功夫，佢有個師傅，我就係師傅個女，佢鍾意咗我，佢覺得我係中國人，佢去學師就識到我！我信佢㗎，因為今世呢，佢後生嗰時又係去學詠春，我老公係同葉問徒弟葉準學㗎，佢𠵱家都好interested in Kung Fu！」
這段前世修來的姻緣，露雲娜說新歌《Forever》就是這個意思，「佢以前同過我一齊，呢一世佢又搵返我，來世佢都想同返我一齊！」相反第一段婚姻，最終離婚收場，成為露雲娜前半生的打擊。她25歲時邂逅了攝影師黃永熹（Sam Wong），情投意合很快便結婚，露雲娜更為了他放棄事業退隱，兩人在1990年生下兒子Brian。
為愛退出，有冇後悔？「我冇後悔，因為我呢個決定好清晰，我唔係一時衝動，我清楚知道我係想結婚，我想去組織一個家庭，我想低調啲做一個好媽媽、好太太，我想做一個稱職媽咪，而唔係交咗畀一個工人姐姐湊。我嗰時都已經唱咗19年，係有少少攰，想過一啲quiet life（平靜生活）！」
誰知道老公有婚外情，令露雲娜晴天霹靂，「梗係冇諗過啦，當時好大打擊，不過𠵱家諗返起，如果呢件事唔發生喺我身上，我就唔會變到一個咁堅強嘅露雲娜囉！嗰時成日瞓唔到覺，有時睇緊報紙都唔知自己睇緊乜，入唔到腦，同埋有一排我好唔開心，唔識得同個仔玩，因為我個仔好鍾意車，我成日都會有好多story同佢講，同佢玩車仔，但係嗰一排就唔識得同佢玩。」
本身有宗教信仰的露雲娜，最終才走出離婚陰影。「我睇Bible（聖經）可以幫到我，嗰一刻我可以瞓到覺！有朋友叫我食藥，我唔肯，佢哋話食半粒（安眠藥）唔緊要㗎，因為我真係一眯埋眼就諗，瞓唔到覺，我都唔肯食，我驚依賴咗啲藥！」不藥而癒，除了聖經，還有露雲娜的兩位姐姐，全靠與身在美國的其中一位姐姐訴苦，心情放開了不少，但長途電話IDD費就每月要付上八千至一萬。
露雲娜（Rowena Ellen Cortes）擁有菲律賓、西班牙、中國和日本血統，她的爸爸和哥哥都是樂手，自細浸淫在爵士樂氛圍下成長，五歲已經自己報名參加英文《星報》的歌唱比賽，小小年紀拿下冠軍而獲得出碟機會，「嗰陣時溫拿都喺度，佢哋叫Loosers（溫拿前身），有阿叻（陳百祥）都仲未有阿B（鍾鎮濤）；另外我記得仲有關正傑，我記得我嗰晚唱咗首爵士樂嘅歌叫《Going Out Of My Head》，我記得贏咗有部車同成set化妝品，化妝品梗係送咗畀我媽媽啦，跟住仲有唱片contract，五歲定六歲出咗一張細碟，EMI唱片同我出！」
五歲出道，接連唱歌拍劇拍電影，《千年女王》的《傳說》到《荳芽夢》，露雲娜的童年與青春，大部份時間都獻給了音樂。「我哋喺TVB成日都唱live，我記得我同賈思樂仲有一個音樂節目叫做《樂在其中》，我當時15歲，嗰時我返緊學，星期六先得閒去錄，我已經慣咗朝早9點鐘已經識得『開聲』唱到歌！」
自此造就了露雲娜和賈思樂的螢幕情侶形象，兩人超過40年的情誼至今不變。另一個和露雲娜至今都是無所不談的好姊妹，是久違了的周秀蘭，「你記唔記得周秀蘭呀？我同佢到𠵱家都keep住聯絡，我每次去溫哥華都會搵佢，我同佢好好朋友，我哋真係click到，咁多年都係咁好姊妹！嗰時《荳芽夢》就係翁靜晶、我同周秀蘭三個囉，翁靜晶呢，我哋幾年前就喺facebook撞到，佢𠵱家又結咗婚，最近又做咗婆婆，我戥佢好開心。」
唱了半世紀，露雲娜至今依然勤力練歌，她說沒有打「天才波」這回事，有天才而不努力也是枉然。上一次的復出，因為與陳奕迅合唱《講男講女》而回歸樂壇，匆匆已10年，露雲娜仍然記得和陳奕迅在錄音室初遇那一幕，「Eason開門畀我，攞住一兜唔知係餸定乜嚟，着住短褲着住對屐又紮住條辮，好似乜嘢一丁麵個樣呀，好好笑，佢開門畀我，我哋好好傾，一傾就可以click到！」面對後輩，露雲娜也會緊張，「佢係陳奕迅喎，我又冇出嚟咁耐，你仲要開門畀我！佢話佢細個係電視精，佢好鍾意睇《千年女王》，佢就知道露雲娜姐姐係唱《千年女王》呢隻歌，《荳芽夢》、《戚眼眉》、《雨中Sha La La》呢啲囉！」
兩年前，露雲娜作出了人生新嘗試，教起唱歌來，「我經理人encourage我，佢話我得㗎，可以試下教唱歌，我又覺得點解唔教呢？可以栽培啲下一代，咪試下囉！覺得好充實，原來我可以教到人，我睇到佢哋有進步就好開心，我教你點樣唞氣，原來真係幫到你喎，我教你點樣用丹田氣，你個音又真係圓咗喎，我好開心咁樣幫到人。」
今年3月，原先露雲娜打算舉行50周年紀念音樂會，可惜因為疫情訂好的場地也要取消，性格樂天的露雲娜惟有再等好時機，「我覺得呢個世界，如果冇咗音樂，係一個好灰暗嘅世界，我有時都會唔開心，我攞隻CD出嚟，擺入去聽，搞掂，即刻開心返，真係會畀到一種力量你。我今日跌低咗，我起身，真係可以㗎，有陣時我諗我係好幸運。」
另一樣幸運是，露雲娜怎樣看也不像已經57歲，活得開心快樂就是最強護膚品。早前愛煲韓劇的她，近來少追，比較多是上YouTube觀看各類煮食影片。
原來是為了老公，「因為我老公好鍾意食嘢，我以前好少煮，𠵱家可能煮得多，我老公話好好食！佢唔鍾意出街食，佢日日喺屋企鍾意食我煮嘅嘢囉！我成日覺得自己係《大長今》，好鍾意煮飯。我煮中餐，又煮泰國咖喱，又有煮意大利，我老公好鍾意食唔同嘅意大利粉！」
最拿手好菜？「我最拿手係煮泰國綠咖喱，我老公話全世界最好食就係露雲娜嘅綠咖喱！我希望寫一個cookbook，叫做《Ro Can Cook》！哈哈！」果然係箍住老公個心，最好箍住個胃！
場地提供：Teppanyaki Kaika（The One）