人與人相遇多麼難，當初譚得志答應我們受訪，未暇見面已被捕，記者探監，落入他的窗口，終於走進他的視線，沒想過三日後收到他的信：「感謝你來拜山，你就是那位訪問陳志全離開立會，做了一版訪問那位記者嗎？感謝你關心我們，我那天說出嚟第一個搵你接受訪問，飲啤酒，是真的，酒過三巡，真話就來。」
快必一再申請保釋被拒，離不開荔枝角收押所角落，傳說中曾蔭權住過的那間水飯房。
有緣不散，他與前特首先後單獨囚禁於此；無緣不聚，這杯酒始終沒喝上，後會也未必有期，記者手上幾頁真話，得他同意刊出。
縱是書信，一如親述，金句不絕，「Donald Trump不是我老竇，信拜登不如信連登。」
讀者大抵更關心他的前路，信中寫道：「冇人估到我會有此經驗，我也不能估到我之後的情況。」
記者：黃啟發
蘋：《蘋果》記者
譚：譚得志
蘋：今次控罪與街站有關，為何你明知選舉押後仍擺街站？倘若出來，是收火還是依然故我？
譚：收火未？擺街站為乜？你一路跟開我的文字、Patreon、D100節目，你會知道我未收火，𠵱家收火，之前做的，全是白費。出到嚟第一件事做乜？飲返罐啤酒，打返次邊爐，然後，禮拜六日，街站見！我仲有大把橋，早排搞返嗰啲濕X本地旅行團，如果有心，我就開間旅行社，其實D100就係啦，個個禮拜搞「香港歷史旅行團」，台灣啲本土主義係咁㗎，唔係口旱旱一到選舉，個L個都話自己本土本土本土嗰啲本土機會主義者呀，你睇我收火未？
擺街站為乜？2016年至今400、500幾次街站，個個街站都告我發表煽動文字，拉我坐10,000年監吖嘛67！擺街站當然梗係一定絕對唔係為咗選舉啦，勤力係冇用㗎，食到條水機會主義先係選舉王道吖嘛，擺街站係為咗啟迪民智，見吓街坊，飲吓啤酒，街頭佈道，教會街頭佈道傳福音嗰啲呀，明嗎？
蘋：我們不想用犧牲一詞，但你的付出有沒有底線？
譚：我的付出有冇底線？我不是純粹的付出，我記得有句英文咁講：「Love what you do, do what you love.」因此，我過去一直做的，都有我的「嗜好」成份，你可能再問：「嗜好到俾人屈坐冤獄，這是變態而不是嗜好啊！」SM都有人玩啦，用SM比喻抗爭，也許我是史上第一人，我當然認為現在是冤獄，禮拜六下午四點我應該在街站同你一齊嗌口號keep住態度，不應在荔枝角30呎劏房寫信，但既然個苦杯要隊過嚟畀我飲，我就一飲而盡吧！
我的底線也是我家人的底線，我沒有自己的底線，家人是我的底線，而我家人的底線是不斷遷移的，很久很久很久以前，她叫我可以抗爭，但不可以被捕，到我被捕了，她搬龍門說可以被捕但不可以俾人打，到我俾人打了，她又再搬龍門，可以俾人打，但不要坐監，𠵱家監也坐了，她居然同我其他朋友說，她支持我一直的抗爭，甚至覺得可以去得盡啲。
所以，我的底線不由我一人決定，由我家人、人民力量戰友、朋友、整個群體去決定，我今次坐冤獄，佢夠膽判我十年，同劉曉波睇齊，我又睇吓全世界點睇呢件事，所以，抗爭底線、付出底線，是由所有人決定，這是一個互動過程。
蘋：政府會困你多久，還有甚麼方法對付你？
譚：真係冇得估，十年啦，我一條罪可入兩年，癲起上嚟差唔多啦，咁我律師咪上訴囉，唔通劫獄咩，特朗普同拜登會丟原子彈嗎？劉曉波都11年啦，香港有一國兩制，有保障，少一年，十年。仲有大把方法對付我，再搵啲違反人權嘅惡法告我，實搵到㗎，夾硬上庭，個官又唔畀我保釋，冇成本好易做，咁係最文明的手段了，愛國做任何事都唔犯法，梁振英講嘅，預咗唔使驚，一係就收聲。
蘋：為何人民力量成為政府眼中釘、肉中刺？慢必本人也是打壓對象，自顧不暇？
譚：點解人民力量成為政府眼中釘？因為我哋唔收聲！押咗韻，呢排我寫詩，搞到慣咗押韻。我自己2016年選舉後一直唔收聲，當人人話三線抗爭（議會、街頭、國際線），查實冇人喺街頭，除咗我，你話唔開得街站咩？限聚令，我派口罩有豁免，吹呀？慢必在議會一直搵空間抗爭，2011年（人力成立）至今令人人都人力化，出到街人人都講「議會內外抗爭」、「回水一萬、兩萬、三萬」、「民主黨？收皮啦」，10年前冇人講啦，唔整死人力整死邊個吖？
加上我哋冇改政綱，冇摺埋個字頭，點解？我哋一直做得啱，一直匐匍前行，冇因為「咦？興本土喎！」就話自己本土，「咦！興自決喎！」就話自己自決，人力不隨波逐流，不機會主義，咁L巴閉，就搞你！仲有我L狗，教人踢保，係好乞人憎㗎！
其實個暴政已經對我同人力好好，佢可以搵人扮修路工人，吼我架車一出，攔住我，燒死我㗎！林彬《十八樓C座》咪咁嚟囉，大班成日提醒我㗎，記住喎，燒死我係唔會俾律政司告㗎喎，所以，𠵱家人力未係「最」眼中釘，遲啲個政權見到「咦？拉佢告佢唔驚，坐監又唔驚！可能要林彬；或者林義雄（台灣滅門慘案）咁先驚喎。你以為唔會有呢一日咩？」
慢必自顧不暇嗎？這是一個Scale of Economy（快必或指Economies of Scale）的心態，你拉一次，驚，措手不及，拉兩次三次四次，不外如是，坐第一次，驚，坐第二三四次，也是如此，所以，快來吧！Come on baby, don’t be lazy！攬炒不是口號，不是說「狹路相逢勇者勝」嗎？口號無憑，抗爭為據，人民力量！
蘋：社會運動由開始到沉寂，有何總結？
譚：點總結呀？咁多人死咗，咁多應該死全家嘅未死，咁多人冇咗隻眼，點總結啫？繼續用各種方法，到死誓相隨囉，要有一種「猶太人痛恨納粹希特拉」的級數去痛恨暴政，要有一種「228死難家屬」的哀痛，去找這個暴政算賬，我唔會講嗰啲「每場運動都有起有跌」，「冷咗落嚟嘅其實係蓄勢待發」呢啲說話，應用各種方法報仇，而不是自欺欺人。
我總覺得，我們未ready，未夠，現在做的所有嘢，都係虛招一晃，香港人都在找一個安舒平衡點，真正想「爭取」點甚麼的人，少之又少。我不想用「底氣」，太大陸用語，我用「內蘊」、「能耐」不足夠，但冇得逼，城市人性格如此，入面的人大概也如此，這兩年、這四年的「成就」已經很了不起了，但真正成就了甚麼呢，好像又真的沒有，我們總是ad-hoc嘢，就連學者，也沒有一些較為深化的思考，可能是我誤會了大家而不是大家的問題。
蘋：泛民今後還有何玩法？
譚：如果冇選舉，就要博拉，博拉，再博拉，G phone、肥佬黎、周庭，拉之餘要入獄，要坐監，引發世界反應，如果你話：「唓！世界點會有反應啫？咪儍hihi啦。」咁即係之前講嘅國際線是「過譽」了；如果有選舉，「白票運動」令個選舉有幾百萬票白票，移咗民嘅都返香港投，諗起都開心又興奮，但如果「泛民」認為：「唔好喎，可能佢阿爺出年又想溫和返，招安搵人做花樽呢。」咁lesser evil，香港人都想繼續呃呃𠱁𠱁，搵水炒樓呢？咁就唔好搞白票了，直接跪低，叫香港人一齊認命，咁就OK了。另外，流亡政府/議會也是一個想像空間。
我講咗幾年啦，當年民主派有高山大會，盧龍光牧師都有港人救港運動，今日，乜「意志綱領上的精神方向」全部欠奉，2018年我已經提議戴耀廷世界人權宣言70年寫份《香港一八憲章》，遙遙呼應哈維爾《七七憲章》和劉曉波《零八憲章》，可惜人微言輕，共鳴者少，其實今日寫《香港前途憲章》也未遲，驚死就唔好了。
哈維爾出過很多書，近日多人談論的是《無權力者的權力》，我讀過他另一本《來自遠方的拷問》，是別人訪問他的對話集，其中有條問題好正，有人問哈維爾：「有冇諗過自殺？」佢答：「有，日日都諗，成日想像有條繩縛在脖子上，幾時需要吊死自己呢？日復一日，日復一日，也不必要用到那條繩子。」