昨日講及之張正先生（張亨利）在1960年代，係社交舞名師，學生遍香江，佢在新亞書院旁聽，與左丁山常有交往，除咗教我哋跳舞之外，還有不少人生故事與我哋分享，以久經風雨過來人嘅身份，教我哋做人處世之道。聽張先生講，佢三十年代在上海暨南大學讀書，家中還有個錢，生活無憂，上體育必修課程因跳不高，走不快，畀講師責怪，諗住肥梗，後來知道體育課程有一科係「舞蹈」，諗住跳舞係行來行去，應該可以及格啩，點知一上課便知道不是那回事，但導師好開放，除咗教社交舞外，又帶佢去錦江飯店睇社交名媛跳舞，帶佢去大舞廳搵舞小姐實習，最後還帶佢去跑馬場及逸園跑狗場，故此佢當年話：「上海十里洋場，遠比香港先進，香港當年只係一個小商埠。澳門依家先至有跑狗，係抄自上海嘅啫，上海好好玩，香港遠遠比不上。」
點知道好景不常，之後發生日本侵華戰，國共內戰，十二三年之間，上海已破滅，張先生攜家眷逃來香港，住在赤柱小屋，大陸家產蕩然無存，最淒慘時候，要買狗糧回家吃，聽到左丁山目瞪口呆，進一步瞭解苛政猛於虎嘅道理。如何絕處逢生呢？張先生話試吓筆耕，寫人哋未寫過嘅嘢，就係將當年上海學跳舞嘅心得，用「腳板圖」表現如何跳慢華爾茲，快華爾茲、牛仔舞，估唔到「香港時報」肯刊登，有稿費，開始有人知，於是化身為跳舞導師，張先生在新亞飯堂對左丁山講：「讀大學主修甚麼，我都唔記得晒，但勢估唔到亂打亂撞選修舞蹈，來到香港竟可以養妻活兒。」佢教跳慢三方法好簡單，聽住「一蓬拆，二蓬拆，三蓬拆拆」「一嗱二嗱三嗱轉，又嚟一嗱二嗱三嗱又轉身。」學生學得十分輕鬆，但只有一位物理系女同學幾有天份，跳得零舍靚，幾年後仲成為張先生嘅得意弟子，做佢示範舞步嘅dancing partner，左丁山就天生愚笨只係學到「一嗱、二嗱、三嗱」。張先生有一位公子在TVB開台時跟梅施麗做舞蹈藝員，不時在特寫鏡頭出現。好似係1982年，在TVB見到佢教一位年青藝員跳舞，連忙錄影，可惜現已不存，嗰位藝員叫做劉嘉玲。