球王馬勒當拿走咗，只可以講惋惜，足球歷史上佢佔有好大幅版面，所以多謝你為世界足球帶嚟光輝一頁，傷心到呢刻為止，世界繼續轉，工作吧！
大家記得之前一星期，我有講過神戶勝利船同橫濱水手，為咗亞冠盃而喺日職點準備，出嚟嘅效果好壞參半。橫濱水手完全喺我嘅計算之內，防守夠穩突擊成功，結果僅僅熟小勝上海SP。至於神戶，佢夠膽死照攻，又畀佢博到，睇到強國所謂班霸，狀態明明唔差，不過神戶一樣可以贏FC廣州3:1。
戰果反映出一啲嘢，狀態其實FC廣州真係唔太差，只係把握力輸左九條街，唔夠幾日又有報仇機會，為免提早出局，小弟相信FC廣州攻力會係上一場一倍。但我又覺得咁，強國球風一向只係死嚟、鬥牛，屈體力係佢哋嘅唯一武器，但上場要守恩尼斯達唔係好掂，神戶都想攞埋呢三分，提早出線，上場入到三球，追多次神戶，受讓平/半要下盤，補多個「大」，合情合理。
另一場橫濱水手對上海SP，唔講日本仔，唔講強國人，講巴西人，上場波最好睇一刻就係換咗侯克後，佢同教練嘈交嗰吓，佢直行直過咁入更衣室。但教練冇做錯，調動後真係博到12碼，差啲贏埋，不過奧斯卡杜斯山度士敗家，臨完場仲要失波最後輸埋。種種嘅唔順，踢波最忌，又亂又冇運，今次隨時冇侯克，繼續要橫濱水手，贏埋就可以提早出線！
文：黃耀富
截稿前馬會尚未開盤，盤口僅供參考，讀者記得留意足智彩網頁。