【娛樂人物】
組合Super Girls成員趙慧珊（Aka），去年單飛推出三首歌，今年疫情下再推出勵志歌，鼓勵大家無畏無懼衝破障礙。原來Aka從小很細膽，遇到問題時只會喊及等人幫忙，現在才學會喊不能解決問題：「會先叫自己靜一靜，然後問應該點做。」曾對感情沒底線的她，自言已六年沒拍拖，經歷情傷後，已學會不再因恐懼失去，而委曲求全。
撰文︰祖李
今年33歲的趙慧珊於疫情下創作新歌《Fearless》，目的為大家帶來正能量，她說要突破恐懼惟有先擁抱。談到恐懼，Aka坦言從小很驚青，小事情也會很害怕，她曾因電視劇中父母離世的劇情，見到爸媽突然大哭：「諗起如果父母唔喺身邊點算，呢個係人生最大嘅恐懼。」她試過小時候與表妹玩炮仗，差點炸聾︰「佢向我射炮仗，嗰吓we聲好大，耳仔勁痛，真係驚聾咗，於是大聲喊想蓋過爆炸聲，細個驚就只係喊等人幫，大個咗知道喊係冇用，會先叫自己靜一靜，然後問自己應該點做。」
Aka說人越大，恐懼的事情越來越多：「以前朋友揸車快我唔驚，但𠵱家遇到的士司機開快車，會叫司機唔好開咁快，心態好唔同。」談到早前被流浪狗咬傷，她猶有餘悸說：「當刻最驚係唔知個嘴嚿肉喺唔喺度，係咪被隻狗扯走咗食緊，定係個嘴已溶爛不堪，我惟有冷靜即刻搵鏡，即刻去醫院，但情緒都好激動。」
Super Girls成立不夠兩年，2014年就被迫轉公司，最終轉到Jam Music旗下，去年成員單飛發展，Aka坦言：「心諗唔係出道兩年我哋五個就要面臨冇咗唱片公司、要解散呀嘛，嗰陣好迷失、恐懼，直至舊年由女團變單飛，好多嘢得返自己處理，每次工作都要用雙倍時間準備去克服嗰種驚，逼自己獨立。」
工作求突破，Aka亦要克服愛情盲點，六年前與吳業坤分手後，她坦言情傷太重，怕再遇渣男︰「𠵱家唔心急拍拖，因為好驚再好似上次嘅經歷，令我覺得點解呢個世界咁多人對愛情冇承諾，我一直憧憬對方係我嘅唯一，唔知呢種諗法喺呢個世代啱唔啱，但我希望將來會遇到。」她指年輕男子難抵引誘，寧願等多幾年遇到更成熟的對象。
Aka自覺上一段感情太縱容對方，甚至失去自我：「呃我話瞓覺，其實出咗去飲酒，甚至上咗個女仔屋企，𠵱家諗返都好hurt，上咗一課囉，再有咁嘅事就要斬纜，有返自己原則、底線，唔好夾硬接受，否則連自己都冇埋。」
服裝提供：Ade.C
場地提供：Bilibala