效力英冠打比郡嘅球星朗尼，喺球會炒咗荷蘭籍領隊高古後，一開始原本係同曾效力富咸同侯城等球會嘅前球員羅仙尼亞一齊管理球隊。不過新任球會技術總監麥卡倫認為咁樣嘅安排根本行唔通，所以決定由周六英冠打比郡主場對韋甘比起，由朗尼獨自擔大旗做臨時領隊。即將首次獨挑大樑嘅朗尼，就唔會將自己列入落場比賽名單，專心喺場邊調兵遣將。
打比郡早前就宣佈，委任前英格蘭國家隊領隊麥卡倫做技術總監同董事局顧問，希望靠佢嘅經驗協助打比郡逃出生天。麥卡倫上任隨即檢討高古離開後，由朗尼同羅仙尼亞共管球隊嘅安排，佢最後決定，由朗尼獨自任臨時領隊，仲全權負責出場人選同戰術，至於麥卡倫只會喺背後畀吓意見。所以打比郡周六對韋甘比時，就會係朗尼首次單丁一個任臨時領隊，而佢仲決定咗唔會派自己落場。
消息就話打比郡最快周五就會公佈由朗尼獨自任臨時領隊，但佢嘅銜頭始終會有「臨時」兩個字。因為打比郡班主摩里斯目前正同一間由阿聯酋油王曼城班主文蘇爾的表弟Sheikh Khaled所持有嘅公司傾賣盤，作價6,000萬英鎊（約6億港元）。一旦交易完成，新老闆或者會有自己嘅組軍方針，有佢心儀嘅球員同領隊，所以一切要到交易完成後先有決定。