【名家足路】
【對決場次︰薩斯索羅vs國際米蘭】
好似電影《頭文字D》京一所講：「我唔會輸畀同一個人twice！」，韋斯咸贏波，將牙骱戰總比數改寫成2:1再次領先，希望11月嘅《一燈決》會以3:1完結。
盧卡東尼自以為熟悉意甲，搵場薩斯索羅主場對國際米蘭嚟對決，仲話薩斯索羅開季到家陣仲係不敗，有得受讓半/一真係筍。少年，你太年輕喇，呢個世界真係有咁大隻蛤乸隨街跳咩，好似星期日英超，牛頭角順嫂都知利物浦國際賽期間傷咗半隊正選，李斯特城開季作客全勝，去到晏菲路都竟然受讓半/一，結果呢？利物浦就輕鬆大勝三粒，一廂情願買下盤，真係輸到眼坦坦。
紙上戰績薩斯索羅係唔錯，開季八場不敗，拎到5勝3和排第2，不過主場真係麻麻地，只得1勝3和，而且贏克羅托內，和拖連奴、烏甸尼斯等，都只係對中下游對手，根本賽程編排令到有假象。係就係打起左前鋒杜文尼高貝拉迪，但後防線就普普通通，4場主場聯賽只係得1場保住清白身。
國際米蘭攻力就梗係冇得彈，一對箭頭盧卡古同拿達路馬天尼斯就入波停不了，難得連「山神」都「弗」番，上輪對拖連奴都有波入，加上維達爾、尼高路巴列拿等中場，火力都幾廣泛。唯一擔心國米周中惡鬥完皇家馬德里，仲要主場輸波，不過干地一向聯賽叻盃賽屎，之前三次踢完歐聯後出戰聯賽，都拎到1勝2和，包括作客擊敗熱拿亞，今場三分都可以話手到拿來，信我，上盤啦！
文：牽牛
《一燈決》係今季新欄目，由上月擂台盟主同上月燈神拗吓頸，睇吓讀者信邊個。