見到一位私人銀行家，講起跳舞群組佢就笑，大家都知道一啲某些人嘅事情，有邊幾位確診，佢略知一二，因為佢有一啲富貴女客戶都係鍾意跳舞嘅。佢話富婆確診，令一啲私人會所好緊張，因為不少係馬會、香港會、清水灣高爾夫球會、皇朝會、賽馬車會會員，未發病之前，到過會所吃飯，一啲都唔奇，又因為富婆們同時亦係阿嫲、阿婆級，有機會傳染畀孫兒、外孫女等等，第三代多數入讀名校，故此一啲名校校長為此大感頭痛，誠恐受波及，要停課也。
一旦傳到學校就弊弊冇咁弊，全港小學停課都似，教育局唔知加強與學校溝通未呢？呢位私人銀行家係左丁山後輩，唔識跳社交舞，問左丁山識唔識。真係奇，跳社交舞呢樣嘢，愈老愈識得多，五十歲以下者，似乎對跳社交舞幾生疏，或者與讀書時生活有關。左丁山一代在1960年代讀書時，常有「開派對」之事，有一兩位同學家中有錢，屋企有大廳就可以，徵得父母同意，在家開party，中學亦肯借出課室開party，左丁山參加過不少，但因為跳得差，經常食女同學檸檬，嗰陣時，拔萃仔、喇沙仔、華仁仔每年開party，門當戶對，邀請女拔、瑪利諾、聖瑪利、德望女生參加，跳得好高興，依家唔知仲有冇呢？
參加得party，自不然要起碼識得一聽到Tennessee Waltz就出動，到播出唱片Changing Partners就係差不多夠鐘鬆人嘞。
入中大之後，新亞書院誠明堂（農圃道）不准開party，所有中大系會、學生會開派對籌款，要借用堅道聯合書院張祝珊禮堂，故此有「張祝珊大舞廳」之稱。舞技差，怎麼辦？世事講運，當年一位著名舞蹈教師，張亨利（原名張正）先生，忽然間慕名到新亞書院做旁聽生，上曾克耑老師之書法，又聽潘重規老師講紅樓夢，冇人識佢係邊位，只有左丁山常讀香港時報，知道佢就係「跳舞專欄」之作者。識咗佢有福氣，佢一個星期來新亞兩次，請我哋食（平時冇錢食）三元半大餐，講上海戰前掌故逸事，最後畀我哋感動佢在新亞開班，教跳社交舞如快三、慢三、狐步、rumba、cha cha、牛仔舞等等，不收學費，不過只能學識基本步，要深造，就要到YMCA交學費上張先生跳舞班！