【名家足路】
【對決場次︰薩斯索羅vs國際米蘭】
上周同牽牛兄較量英超二線波，點知榜尾嘅錫菲聯真係咁黑仔，全場唔係踢得差過韋斯咸，偏偏前鋒奧利華麥貝尼中柱又中楣，畀對方好運贏咗1:0，搞到我貼嘅下盤渣都冇得淨，完完全全對輸畀牽牛兄。家陣小弟同佢對賭三次，輸咗兩次，但都贏過一次，今次揀意甲波玩，小弟應該拿手啲。
周六雖然有呢幾季霸主祖雲達斯登場，但對手只係賓尼雲圖，就算作客都好大機會贏波贏盤，反而呢日焦點應該係早三個鐘開波嗰場薩斯索羅主場對國際米蘭，皆因今季呢支進攻型意甲中游隊，表現好對辦，竟然已經爬到聯賽榜第二位，仲高過今場對手國際米蘭。
薩斯索羅今季踢咗八輪未輸過，5勝3和入咗20球，進攻有睇頭之餘，仲連續三場冇失波，當中包括作客拿玻里竟然可以贏到2:0，都叫爆個小冷門，小弟就覺得呢隊波季初走勢係勁，球員打起晒信心，就算主場勝率唔夠作客好，但對藍黑軍團不敗機會都高。
國際呢隊波今季有少少走樣，時好時壞，雖然上輪聯賽幾威，主場對拖連奴落後，最後都可以4:2反勝，但周中歐聯輸完畀皇家馬德里0:2，好大機會出局。雖然話咁樣嚟緊可以專心啲踢好聯賽，但家陣佢哋仲一周雙賽緊，對成班球員嚟講負荷真係好大，對住有氣有力唔使打歐戰嘅薩斯索羅，想好似上場對拖連奴咁靠後勁反勝，小弟就覺得難少少，所以今場薩斯索羅受讓，對個下盤幾有信心，希望可以贏番次。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。