【本報訊】「其實佢個人好nice到不得了，所以呢單嘢咁樣就冇人會相信嘅。」與張祺忠相識半世紀的陳梁材，早前出任辯方證人後在庭外續談本案，他最初以為案件是假新聞，過去兩年來一直支持牢中的老友。陳透露張現今精神不俗，在獄中幫忙計計數，做業餘興趣研究，不過從容背後也許有點裝作堅強，避免朋友擔心，「佢衰就衰在成日唔識講no㗎……」
建築師陳梁材與張祺忠同窗多年，他憶述，張家規矩嚴格，放學總是回家，但無阻張與同學打成一片，「我哋班一個好高大嘅、蝦蝦霸霸花名叫做技安嘅人呢，都同佢好好，因為佢人緣太好喇......即係同佢攬頭攬頸㗎，咁大個出嚟食飯都仲攬頭攬頸㗎。」
好友被控謀殺，陳只望張盡快放監，與子女團聚。他不時約張的子女見面，「Nancy同Scot好錫老豆」，女兒十分擔心父親，積極張羅衣服書本，「講佢老豆possible刑期嗰啲嘢呢，佢就喊囉。」
陳梁材只見過張妻三、四次，張向來不帶妻子出席聚會，「請晒佢哋伉儷，每次都係單拖。」朋友知道夫妻關係不太美滿，為免難堪不會談論。
前年案件曝光，陳最初看到朋友節錄新聞，「我第一個反應就係，邊個衰仔喺度惡作劇？」看到電視報道後始知非假消息，心想「唔係啩？」陳十分擔心張，馬上找律師幫忙，翌日「衝去差館支持佢」，但一個月後才在收押所探望到張。
張在獄中從容平靜，陳覺得有點假裝成份，「等我哋唔好擔心佢囉，即係裝堅強咁囉，佢係咁樣㗎。」不煙不酒不賭錢的張祺忠，好友形容他有這個「缺點」：「佢衰就衰在成日唔識講no㗎，成績要好好，面面俱圓，唔識同人講no囉呢個就係。」
陳差不多每月給張寄信，集合同學通訊群組對話，張收到後回話，如是者三、四十封。陳稱友人們都不信張謀殺，但不欲猜測，「索性唔理會個內情」。