特首林鄭月娥日前公佈的施政報告，被各界評為面向北京、甚至是「賣港」，當中她提出會修改目前選舉安排，政界相信無非是引入大量有利建制勝選方案，務求在下年立法會選舉、甚至之後的特首選委選舉中，民主派取得議席無論如何也不會接近一半，更有政界中人聽聞，有傳聞指連立會選舉制度及方式，也研究可否改變，「總之要做到民主派點選都選唔到35+」。
有政界中人說，其實經去年區選建制派無預計下大敗，北京無論如何也不容此情況再現，「有建制派甚至話，冇百分百安全之前，北京情願唔選住，所以明年9月有冇立會選舉真係冇人知」，而林鄭在施政報告提出修改宣誓條例，就是新增一條「防線」，「選前可以DQ參選人未夠安全，當選之後仲可以用違反誓言DQ你，要買兩重保險」。
不過，他聽聞北京仍覺未夠「安全」，他從一些建制中人聽聞，有傳改變立會選舉制度及方式也在研究之列，「好似有人話，直選改雙議席單票，咁民主派係地區直選咪點都拎唔到過半議席？又例如將功能組別改到民主派點都算唔贏，又有冇方法？」不過該政界中人指，曾幾何時，北京也認為特首選委選舉方式，民主派無法攻陷，「但只要有選舉、只要有票投，乜野選舉方式都阻唔到民意表態，除非北京連選舉都取消埋」。
至於建制想力推大灣區投票，他聽聞應「凍過水」，笑言之前建制派提出，北京沒有明確反對，「但上面計完數，畀你香港人係大陸投票，將民主選舉『輸入』中國仲得了？」所以北京對此有強烈保留，「建制派之前吹到咁，話內地港人投票權不能剝奪，如果到時港府真係縮唔搞，建制派點兜好呢？」
季陶
周一及周五刊出