女權主義成為世界主流的議題，男性固有角色又如何演變？90後香港設計師Derek Cheng和Alex Po從小就不停思考這個問題，及至大學到英國Central St. Martins讀時裝，做功課都會以此為題材。學成回港，二人想以時裝為媒介，繼續探討這個沒有好好被討論和認識的命題，於是創立了時裝品牌Ponder.er。
Alex說：「Ponder.er即係我同Derek兩個名拼埋，以前嘅法文有平衡嘅意思，我哋個品牌就係講緊性別、stereotype等各方面嘅平等。」Derek透露二人一直在生活各方面遇上一些關於性別定型的問題：「以前啲親戚成日會同阿媽講『你個仔好斯文喎』。」直到開始讀時裝，二人發覺男裝設計上比女裝的限制多，「女仔性感係好合理，男仔就只可以T恤、 牛仔褲、西裝，我諗其實男仔一樣可以soft 啲，溫柔啲。」二人覺得香港巿場很少正面探討關於性別上話題的男裝，於是去年創立品牌作為平台，探討男裝更多不同的可能性。
「其實『陰柔』嘅男裝喺外國好普遍，可能香港係一個比較壓抑嘅城巿，人人都只想dress to fit in instead of dress to stand out（迎合大眾主流，不去突出自己）。香港始終都覺得男仔係要剛強，着粉紅色衫可能只會喺club scene出現，其實十分政治不正確，好想藉住自己嘅品牌打破社會對男仔着衫嘅一啲規限同古舊觀念。」
Derek認為香港給他很多啟發，「我哋自開始以來都同香港不同嘅creatives合作，圖案、珠寶、場景設計等都係由香港人一手包辦。服飾中加入不同香港元素，最明顯應該係我哋今季用紙紮嘅元素做了一隻馬拍攝用。」同時覺得深水埗是個寶藏，可以很方便找到想要的東西。
Alex和Derek都很着重面料的研究和運用，「伸縮線smocking、see through、knit都係我哋一啲好標誌性嘅元素，我哋會利用一啲好典型嘅傳統男裝，例如西裝、乾濕褸、恤衫，保留男裝特質，make sure每一樣嘢都有大pocket，然後喺當中加入Ponder.er嘅twist。」所謂twist，就是品牌式的「柔順劑」，完全改變服飾的既定形象，「例如恤衫我哋會加入伸縮線去縫製，改變手感，變得好柔軟。今季我哋有part knit背心，一部份做到透視效果，另一部份就唔透。」他們覺得香港在性別的議題上有部份已經走下坡，「以前有張國榮、黃耀明去挑戰性別禁忌，𠵱家大家都着得街頭，偏向主流，依住範本去着而缺乏個性」。
品牌春夏2021系列的設計靈感來自50、60年代美國的香煙廣告，二人說：「可能時代唔同，所以𠵱家睇番會覺得好搞笑，佢哋強調男性主義一定要好masculine，好多肌肉，只可以gel油頭。當中可以睇到好多當時一啲好政治錯誤嘅訊息，例如男人食煙女人一定會追隨你，我哋今次呢個系列就要去取笑番以前嘅人對性別上定型嘅可笑位。」
撰文：楊慧珊
更多精采時尚內容，盡在http://add.appledaily.com。