疫情之下，失業巨浪席捲各行業，大量打工仔慘變「刀下亡魂」，45歲的好姨，與丈夫原是家中經濟支柱，但疫情殺到二人雙雙失業，做酒樓樓面的好姨過去9個月零收入，丈夫「炒散」做裝修散工，搵得一日得一日，擔心最後要「揸兜乞米」。
「公司要求我哋放無限期無薪假，3月1號放到𠵱家，都冇叫我哋返工。」好姨本來在連鎖酒樓集團工作9年，今年年頭公司要求員工放「無限期無薪假」，更指另行通知上班時間，之後音訊全無，變相裁員。她的丈夫原是地盤木工，但亦失去工作，她嘗試到公司要求復工但無人理，更被無情趕走。
同時失業下二人十分徬徨，好姨哽咽：「有兩、三個月零收入。」疫情前，二人收入近4萬元，一家六口，有老有嫩，下有10及18歲女兒，上有80多歲老爺奶奶，女兒學習費用及長者醫療開支甚大，壓力可以想像。
尚幸他們生活慳儉，零收入下好姨動用積蓄應急。當中包括為女兒未來省下的學費，令她十分心痛。為省錢，每日三餐開支要「諗過度過」，每日都趁傍晚趁特價時段才到街市買餸：「等夜晚平啲先買，10蚊3份菜，啲肉都平啲。」
為免花光積蓄，好姨與丈夫四出找散工，搵得一日得一日，丈夫曾做貼磁磚及泥水的裝修散工，至於好姨則一直未找到新工，她指失業後見過4、5份酒樓工都「食白果」，現時考慮考保安牌轉行，清潔工或廚房雜工都考慮，「希望有份工做，有飯食。」
經濟壓力幾乎令她崩潰：「日日憂慮好多，變到抑鬱症咁。」現時她每晚失眠，沒有胃口，記性轉差。她亦感到丈夫壓力，「見到大家咁艱難，鬧交都忍咗佢。」她曾到社署申請援助，但因有購買儲蓄保險被拒，感嘆現時政府對失業人士支援不足。「以前覺得香港大把工做，而家搵份工做都咁艱難，世界點解變到咁樣？」好姨坦言不知失業生涯何時完結，只盼好日子來臨。