777喺星期三宣讀《施政報告》時，首次喺外套左胸扣起一個國旗crossover區旗嘅襟章，左媒仲話咁係體現「一國兩制」，不過學777喺《施政報告》話齋，對於維護「一國兩制」要「正本清源，撥亂反正」，有網民就非常眼利，發現777戴嘅呢個襟章望落有啲問題，原來係當中國旗竟然係被反向展示，即係五星位置喺晒右邊，而區旗睇落又同國旗一樣大，兩者仲要平排展示。
睇番《施政報告》，裏面先話國旗「必須得到法律保護和市民尊重」，但根據政府禮賓處嘅官方指引，其實當平列懸掛國旗同區旗，國旗要喺右而區旗要喺左，兩面旗同時使用，區旗仲要小於國旗，咁777個襟章睇落除咗政治不正確，仲隨時未必合乎要求囉。八方問過特首辦，究竟777個襟章由邊個設計、製作同生產；佢戴之前有冇問過法律意見審視係咪合乎法例等連串問題，但去到截稿時都冇獲回覆。
李八方