特首林鄭月娥終於公佈咗佢份「施政表忠報告」，毫不掩飾佢嘅出賣香港人大計，佢噚日去立法會出席特首答問大會，因為已經冇晒民主派，再加上有傳西環下旨要力撐，結果答問就冇，變成建制派全力吹捧777博寵幸大會。之不過，建制派裏面都有人表現出酸溜溜，呢個就係實政圓桌田北辰啦，因為777冇點佢個名，全因唔滿意二少前日講嘢害佢。
事緣777噚日喺特首答問大會開場時，即狂數自己過去三年嘅所謂「政績」，同時點名話自己將一班建制派提嘅訴求納入施政，榜上有名嘅包括潘兆平、吳永嘉、張華峰、葛珮帆同陳克勤等人，但就係冇點田北辰個名，咪搞到佢好不是味兒！所以田二少發言時感嘆自己無畀777點名，之後仲低聲下氣話自己「唔會害你」，開到聲希望777下次嚟立法會時記得提佢個名，以示有回應佢啲訴求。
田二少幾乎將「阿特首姨姨我不想努力了」噏到口邊，但777就唔太領情，喺答問題時主動反擊，話田北辰前一日形容《施政報告》係佢爭取連任嘅政綱，呢句嘢令777好唔高興，話田二少「已經害咗我㗎喇」，777話：「你話我呢份施政報告係爭取連任已經害咗我，我冇呢個意圖」，而班建制派聽到，當然係一齊哄堂大笑。
李八方