疫情下旅遊業雪上加霜，旅行社管理層阿Da今年9月慘食無情雞，炒魷魚前一日她還在交計劃書，翌日便接大信封。本身是家庭經濟支柱的她，兩個月來努力搵工仍無着落，現時她靠積蓄生活付家用，幸好兄長仍有工作，才維持到一家三口生活。眼見女兒失業，半退休的Da媽重投工作，一家人一起撐住頭家。
「一早打電話嚟話，唔好意思我哋要拜拜。」重提裁員一刻，她十分無奈，因為之前一日開會時，公司還交帶她交上計劃書，令她意難平。「頭一日，甚至頭兩個月都唔相信被裁，因為早一日開會講緊來年嘅事。」受疫情打擊，近一年來旅遊業幾乎完全停擺，阿Da的公司都算是大規模，亦要裁員一半，任職管理層的她亦不倖免。
阿Da原是酒店前台員工，遭舊上司「挖角」加入旅遊社。任職旅行社4年的她是部門主管，負責東南亞旅行團，既要培訓導遊，亦要與當地公司接洽確保行程順利，工作雖然繁忙，但能夠令行程圓滿安排是最大滿足感，「就算幾日無瞓，個人都開心。」失業毫無預警，阿Da自言頹廢了一個月。之後到處求職，最初希望重投旅遊業，但眼見復蘇無期，嘗試透過獵頭公司搵工，豈料連獵頭公司亦裁員無法安排面試，決定轉行。為的是要養家，因為Da媽已半退休，一直由阿Da及兄長供養。阿Da現時學習沖咖啡，希望日後轉型開Cafe，Da媽亦支持近日重投工作，身體力行撐女兒。
