與泰星查朗擂台戲　鏡頭就位點知嚟真　
周國賢中拳爆眉骨入院縫八針

唱作歌手周國賢與泰國演員查朗桑提納托古（Chanon Santinatornkul）主演的新片《一秒拳王》暫定於下周四上映，日前拍煞科戲時，周國賢意外被查朗的手踭批中眉骨，即時血流如注，最後要到醫院縫八針。周國賢日前在電影花絮中憶述受傷過程，自言見到傷口都「心寒」。

「唔知咁應」

周國賢在片中指當日與查朗對打，對方出拳又狠又快︰「我day one已經知道，我睇片未認識查朗時，好多人話佢出拳好快、好準、好重。直到同佢打，佢啲速度可以用《屍殺列車》嚟形容，真係好恐怖！佢衝埋嚟啲步又重，『嘭嘭嘭』，又快，其實好大壓迫感。」

從花絮片段中所見，周國賢與查朗埋身肉搏，查朗連環出拳，雖然原本以鏡頭就位，但數拳過後查朗打出一記左勾拳時，只見周國賢忽然低頭叫停，他回想受傷過程︰「嗰一刻我完全唔知道俾佢打中咁應，直到嗰幾拳完咗之後，嗰頭上返嚟，突然覺得有啲『水』唔知喺邊度滴落嚟，望一望拳套係紅咗。」周國賢當時根本不知傷勢嚴重，惟見在場工作人員都面青青，導演趙善恆急急腳行過來時，才意識到危險。 最後一行人到醫院，周國賢經診治後縫了八針。

「睇到心寒」

其後，周國賢回到片場看重播︰「返到片場睇返條片，先知道個傷口好深同闊，我都唔知點形容，自己睇到都心寒。」不過，周國賢見查朗懊惱的表情，只懂搭住自己膊頭不知說甚麼好，於是反過來安慰對方，周國賢說︰「明白大家係想做好本份，所以由始至終都冇嬲佢。反而驚自己狀態咁影響進度。」與導演開會後，他們決定將這段受傷片段變成劇情，現在周國賢右眼角傷口結了一條疤，更添拳手味道。此外，憑港片《邊緣人》贏過金馬獎最佳導演的章國明，昨日在facebook專頁貼出女兒Ashley跟周國賢及查朗的合照，原來Ashley是《一秒拳王》的編劇。