中國足協周三喺蘇州同中超球會開會後，一致通過下年會再壓低球員薪酬上限，本土球員嘅年薪上限由之前嘅1,000萬人民幣降低至稅前500萬人民幣（約600萬港元），外援嘅最高人工亦由稅後300萬歐元改為稅前300萬歐元（約3,000萬港元）。
其實早喺2018年，中國足協就已經推出限薪令規定土炮球員年薪最高唔可以超過稅前1,000萬人仔，而外援最高人工就規限喺稅後300萬歐元，但因為武漢肺炎疫情爆發搞衰個經濟，為免自己害死自己，於是又作出今次調整。
呢個方案會喺12月正式公佈，但外援得300萬歐元嘅稅前年薪，真係仲搵到咩其他外籍頂級球星過檔呀！家陣中超最高薪外援，就係上海上港嘅巴西球星奧斯卡杜斯山度士，據講佢家陣1年仲攞緊2,400萬歐元，其他好似巴卡保同傳年尾就會離開嘅艾沙拉維、侯克等等，都全部過千萬歐元，雖然今次呢個薪酬上限對之前已經簽咗嘅球星嚟講冇影響，但之後想再簽呢類有名氣嘅球星，就幾乎冇行喇。
或者因收到風，廣州恒大周三喺亞冠盃G組，1:3輸畀有恩尼斯達入波嘅神戶勝利船，重開後兩場分組賽都贏唔到。
