早前公佈派5,000蚊畀確診武漢肺炎人士安排時講到唔清唔楚，惹嚟坊間劣評如潮嘅食物及衞生局局長陳肇始，噚日煞有介事同特首林鄭月娥一齊現身行會前嘅記者會，咁自然被記者追問點解講到唔清唔楚，搞到勞福局長羅致光前日要出嚟補鑊。點知林鄭率先搶答，仲要死撐話點都好，政府都冇偏離幫助「手停口停」巿民嘅「初心」喎。
呢單俾網民搞到變成鬧劇嘅派錢大計，作為特首嘅林鄭，繼續講到好似成件事唔關佢事咁，責任全部喺陳肇始度。林鄭話呀，派5,000蚊嘅詳情唔係食衞局搞，而係勞福局負責，而陳肇始因為太好人，所以盡量答傳媒問題，其實佢係唔完全掌握晒另一個局傾緊嘅內容，又話社會現時可能對於數字反應好敏感，即係千錯萬錯又係陳肇始錯！陳肇始喺林鄭身後做佈景板，企咗足足42分鐘，其間除咗一度𢱑頸外，一句嘢都冇講就轉身離開，八方相信好多人都唔明，佢噚日朝早企出嚟其實為乜？
至於自爆係背後獻計人嘅行會成員兼工聯會立法會議員黃國健一樣被人恥笑，但佢噚日朝早喺商台節目澄清，計劃原意係專門幫助一班打工仔，好似的士司機呢類。
黃國健話對社會譁然始料不及，仲話係社會反應情緒化，又唔覺得計劃會鼓勵市民染疫，相信冇人會為5,000蚊病，形容呢個講法好荒謬，仲話唔介意成為眾矢之的喎。
李八方