民主派離開立法會之後，建制派簡直可以為所欲為，就連議員衣着都考慮要規管埋。之前有傳建制派要修改議事規則，議員要衣着「莊重」先可以去開會，議事規則委員會主席謝偉俊噚日去民主黨前議員劉慧卿嘅網台節目，被卿姐問佢都着過短褲仔去開會喎，謝偉俊即時「糾正」卿姐，話佢嗰啲係叫「fashion」！
謝偉俊喺節目承認，真係有建制派提出咁嘅建議，仲形容呢個叫「撥亂反正」，認為立法會議員要衣着莊重先可以去開會，所以謝偉俊話支持有關決定，以免畀人覺得立法會好似無王管咁。不過謝偉俊之前多次被傳媒影到着短褲開會，卿姐就梗係追問佢啦！謝偉俊就即時解釋，話嗰時着短褲開會係星期六，亦唔係正式大會，形容當時嘅裝扮係fashion喎！
其實議事規則委員會喺第三屆立會廢除咗有關衣着嘅規定，估唔到延任嘅第六屆議會會倒退返去十幾年前。
李八方